राहाता : अवैधरित्या वाळूची चोरटी वाहतूक करणाऱ्या आरोपीवर राहाता पोलिसांनी कारवाई करत तब्बल १५ लाख २० हजार रुपये किमतीचा टाटा कंपनीचा डंपर जप्त केला आहे. या प्रकरणी एका आरोपीविरुद्ध भारतीय न्याय संहितेच्या संबंधित कलमान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, १ सप्टेंबर २०२६ रोजी पहाटेच्या सुमारास पुणतांबा-शिर्डी जाणाऱ्या रस्त्यावरील पुणतांबा गावच्या शिवारात ही कारवाई करण्यात आली. आरोपी हा आपल्या ताब्यातील टाटा कंपनीच्या ९१२ मॉडेलच्या पिवळ्या व राखाडी रंगाच्या डंपरमधून विनापरवाना वाळूची वाहतूक करत असल्याचे आढळून आले.
सदर आरोपी स्वतःच्या आर्थिक फायद्यासाठी शासनाची कोणतीही परवानगी नसताना वाळूची चोरटी वाहतूक करीत असल्याचे पोलिस तपासात निष्पन्न झाल्यानंतर त्याच्यावर गुन्हा दाखल करण्यात आला.
या कारवाईत पोलिसांनी अंदाजे १५ लाख २० हजार रुपये किमतीचा डंपर व त्यामधील वाळू असा मुद्देमाल जप्त केला आहे. याप्रकरणी आरोपीविरुद्ध राहाता पोलीस ठाण्यात गुन्हा दाखल करण्यात आला असून पुढील तपास पोलीस करीत आहेत.
सदर कारवाई स्थानिक गुन्हे शाखा व राहाता पोलिसांच्या संयुक्त प्रयत्नातून करण्यात आल्याची माहिती मिळत आहे. या प्रकरणाचा पुढील तपास पोलीस हवालदार बर्डे हे करीत आहेत.
