मालेगाव (प्रतिनिधी) – आखाड्यातील दमदार डावपेच, अंगातील रग आणि विजयाची जिद्द यांच्या जोरावर मालेगाव येथील आस्पायर कुस्ती संकुलच्या सर्वच पैलवानांनी राज्यस्तरीय कुस्ती स्पर्धेत दणदणीत विजय मिळवत संकुलाचा नावलौकिक उंचावला. एकाच स्पर्धेत सर्व पैलवानांनी विजय मिळविल्याने कुस्तीप्रेमींमध्ये आनंदाचे वातावरण निर्माण झाले आहे.
या यशामागे पैलवानांची कठोर मेहनत, नियमित सराव आणि वस्तादांचे अचूक मार्गदर्शन यांचा मोठा वाटा आहे.
आखाड्यात घाम गाळून केलेल्या मेहनतीचे रूपांतर विजयात झाल्याने आस्पायर कुस्ती संकुलाच्या शिरपेचात आणखी एक मानाचा तुरा खोवला गेला आहे.
पैलवानांच्या या उल्लेखनीय कामगिरीबद्दल संस्थापक अरुणजी भोसले, खलिफा विजय गवळी, वस्ताद हनुमंत लोंढे आणि वस्ताद बब्बू सय्यद यांनी सर्व विजयी पैलवानांचे अभिनंदन करून पुढील वाटचालीसाठी शुभेच्छा दिल्या.
“आखाड्यातील मेहनत कधीच वाया जात नाही; आजचा विजय ही उद्याच्या मोठ्या यशाची सुरुवात आहे,” अशा शब्दांत कुस्तीप्रेमींनी विजयी पैलवानांचे कौतुक केले.
