शिर्डी | प्रतिनिधी
शिर्डी पोलीस स्टेशनने गुटखा विक्रेत्यांविरुद्ध धडक कारवाई सुरू करत शहरातील दोन ठिकाणी एकाच वेळी छापे टाकून दोघांना ताब्यात घेतले असून हजारो रुपयांचा प्रतिबंधित गुटखा जप्त केला आहे. या कारवाईमुळे गुटखा विक्रेत्यांमध्ये खळबळ उडाली आहे.
पोलीस निरीक्षक रणजित गलांडे यांच्या आदेशानुसार शहरात सुरू असलेल्या बेकायदेशीर गुटखा विक्रीविरोधात विशेष मोहीम राबविण्यात आली. त्यानुसार एचसी गोमसाळे, पोलीस शिपाई विकी त्रिभुवन, पोलीस शिपाई आकाश चव्हाण आणि पोलीस शिपाई सतपाल शिंदे यांच्या पथकाने पहिली कारवाई धनतारा रोडवरील शेळके मार्केटसमोरील टपरीवर केली. येथे छापा टाकून संजय दळवी याला ताब्यात घेत हजारो रुपयांचा गुटखा जप्त करण्यात आला.
त्यानंतर पथकाने साईबाबा कॉम्प्लेक्ससमोरील पोस्ट ऑफिसजवळ दुसरी कारवाई करत तैखान पठाण (रा. कचरा डेपो शेजारी) याच्याकडूनही मोठ्या प्रमाणात प्रतिबंधित गुटखा जप्त केला.
या दोन्ही प्रकरणांत संबंधित आरोपींविरुद्ध भारतीय न्याय संहिता (BNS) कलम 274 व 275 अंतर्गत गुन्हे दाखल करण्यात आले आहेत.
दैनिक साईदर्शनशी बोलताना पोलीस निरीक्षक रणजित गलांडे यांनी स्पष्ट इशारा दिला की, “शिर्डी शहरात बेकायदेशीर गुटखा विक्री करणाऱ्यांविरुद्ध अशीच धडक कारवाई पुढेही सुरू राहणार असून कोणालाही पाठीशी घातले जाणार नाही.”
गुटखा विक्रेत्यांवर झालेल्या या कारवाईमुळे शहरातील अवैध व्यवसाय करणाऱ्यांचे धाबे दणाणले असून, शिर्डी पोलिसांनी आता अॅक्शन मोड सुरू केल्याची चर्चा शहरभर रंगली आहे
