शिर्डी | प्रतिनिधी
शिर्डीची भूमिपुत्री डॉ. सिमरन साई कोतकर यांनी आर.जी.एस. हॉस्पिटल अँड रिसर्च सेंटरच्या सर्व डॉक्टर, वैद्यकीय अधिकारी, परिचारिका व सहकारी कर्मचाऱ्यांसह संत ज्ञानेश्वर महाराज पालखी सोहळ्यात नातेपुते येथे हजारो वारकऱ्यांना निस्वार्थ वैद्यकीय सेवा देत समाजसेवेचा आदर्श निर्माण केला आहे.
पालखी सोहळ्यातील मोठ्या गर्दीत वारकऱ्यांच्या आरोग्याची काळजी घेत विविध आजारांवर उपचार, प्राथमिक उपचार, औषधोपचार तसेच आवश्यक वैद्यकीय मार्गदर्शन करून संपूर्ण वैद्यकीय पथकाने अत्यंत समर्पित भावनेने सेवा बजावली. या सेवेमुळे अनेक वारकऱ्यांना वेळेत उपचार मिळाले आणि त्यांचा प्रवास अधिक सुरक्षित व सुखकर झाला.
या सेवाभावी कार्याची दखल घेत महाराष्ट्र नवनिर्माण सेना, शिर्डी शहर यांच्या वतीने डॉ. सिमरन साई कोतकर व आर.जी.एस. हॉस्पिटलच्या संपूर्ण टीमचे मनःपूर्वक अभिनंदन करण्यात आले. त्यांच्या भावी सामाजिक व वैद्यकीय वाटचालीस शुभेच्छाही देण्यात आल्या.
डॉ. सिमरन कोतकर या शिर्डीच्या भूमिपुत्री असून त्यांनी आपल्या कार्यातून शिर्डीच्या सेवाभावी परंपरेला साजेसा आदर्श घालून दिला आहे. “सेवाच खरा धर्म… मानवसेवाच ईश्वरसेवा!” हा संदेश त्यांनी प्रत्यक्ष कृतीतून समाजासमोर ठेवला असून त्यांच्या कार्याचे सर्व स्तरांतून कौतुक होत आहे.
