शिर्डी, प्रतिनिधी :
श्री साईबाबा संस्थानच्या संरक्षण विभागातील पहारेकरी राजेंद्र दोहाडे यांनी प्रामाणिकपणा आणि कर्तव्यनिष्ठेचा आदर्श घालून दिला आहे. मंगळवारी (दि. ४) समाधी मंदिराच्या गाभाऱ्यात गस्तीदरम्यान त्यांना ₹३,४९० रोख रक्कम सापडली. त्यांनी कोणताही विलंब न करता ही रक्कम संरक्षण कार्यालयात जमा केली.
त्यानंतर संरक्षण विभागाने तत्काळ चौकशी करून संबंधित साईभक्त महिलेची ओळख पटविली. ही रक्कम सौ. Kasimi Kota Rama, रा. गुंटूर यांची असल्याचे निष्पन्न झाल्यानंतर त्यांना ती सुरक्षितपणे परत करण्यात आली. हरवलेली रक्कम परत मिळाल्याने संबंधित भाविकांनी समाधान व्यक्त करत संस्थान प्रशासन आणि संरक्षण विभागाचे आभार मानले.
श्री साईबाबांच्या सेवेत कार्यरत असलेल्या कर्मचाऱ्यांनी प्रामाणिकपणा आणि जबाबदारीचे दर्शन घडविल्याने संस्थानच्या सेवाभावाची पुन्हा एकदा प्रचिती आली आहे. राजेंद्र दोहाडे यांनी दाखविलेल्या प्रामाणिकपणा व कर्तव्यनिष्ठेबद्दल त्यांचे सर्व स्तरांतून अभिनंदन व कौतुक होत आहे.
