शिर्डी येथील हॉटेल साई आशिष प्रायव्हेट लिमिटेड ह्या पार्किंग परिसरातून अज्ञात चोरट्याने रॉयल एनफिल्ड क्लासिक कंपनीची मोटारसायकल चोरून नेल्याची खळबळजनक घटना समोर आली आहे. या चोरीमुळे शिर्डी शहरातील वाहनधारकांमध्ये भीतीचे वातावरण निर्माण झाले आहे.
फिर्यादी आशिष (वय ३७, रा. चांदे, ता. कोपरगाव, जि. अहिल्यानगर) यांनी शिर्डी येथील पार्किंगमध्ये आपली निळ्या रंगाची रॉयल एनफिल्ड क्लासिक मोटारसायकल (क्रमांक MH-17 CW 4035) उभी केली होती. दि. 28 ते 29 जानेवारी 2026 दरम्यान अज्ञात चोरट्याने लबाडीच्या इराद्याने ही दुचाकी चोरून नेली. चोरी गेलेल्या मोटारसायकलची किंमत सुमारे १ लाख रुपये असल्याचे सांगण्यात येत आहे.
या प्रकरणी शिर्डी पोलीस ठाण्यात चोरीचा गुन्हा दाखल करण्यात आला असून, प्रभारी पोलीस निरीक्षक गलांडे यांच्या मार्गदर्शनाखाली पोलीस नाईक गोसावी पुढील तपास करत आहेत. शिर्डीतील पार्किंग परिसरात वारंवार चोरीच्या घटना घडत असल्याने पोलीस बंदोबस्त आणि सीसीटीव्ही यंत्रणेबाबत प्रश्नचिन्ह निर्माण झाले आहे.
भरदिवसा दुचाकी चोरीची घटना घडल्याने नागरिकांमध्ये तीव्र संताप व्यक्त होत असून, चोरट्यांचा बंदोबस्त करण्याची मागणी जोर धरू लागली आहे.
