अतिरिक्त पोलीस बळ तैनात-शिर्डी पोलिस अ‍ॅक्शन मोडमध्ये!

शिर्डी | प्रतिनिधी
आंतरराष्ट्रीय तीर्थक्षेत्र शिर्डीत वाढत्या गुन्हेगारीला आळा घालण्यासाठी जिल्हा पोलिस प्रशासनाने कठोर पावले उचलली आहेत. आगामी कुंभमेळ्याच्या पार्श्वभूमीवर भाविकांची वाढती गर्दी लक्षात घेऊन जिल्हा पोलिस अधीक्षक सोमनाथ घार्गे यांनी शिर्डी पोलिस ठाण्यास अतिरिक्त पोलीस कुमक देण्याचा निर्णय घेतला आहे.
जिल्ह्यातील सर्व पोलिस ठाण्यांना गुन्हेगारी रोखण्यासाठी विशेष सक्त सूचना देण्यात आल्या आहेत. शिर्डीत स्वतंत्र विशेष पथक स्थापन करण्यात आले असून हे पथक २४ तास गस्त, अचानक तपासणी आणि संशयितांवर लक्ष ठेवणार आहे.

🔥 भाविकांची फसवणूक करणाऱ्यांना थेट इशारा
शिर्डीत येणाऱ्या भाविकांना हार-प्रसाद, पार्किंग आणि दर्शनाच्या नावाखाली अडवून बळजबरी करणाऱ्या एजंटांवर आता पोलिसांची करडी नजर आहे.
अप्पर पोलिस अधीक्षक सोमनाथ वाकचौरे यांनी स्पष्ट आदेश दिले आहेत की, भाविकांना त्रास देणाऱ्यांवर थेट गुन्हे दाखल करून कठोर कारवाई करण्यात यावी.
कुंभमेळ्याच्या पार्श्वभूमीवर फसवणूक, लूट, पाकिटमारी, जबरदस्ती वसुली अशा प्रकारांना आळा घालण्यासाठी विशेष मोहीम राबवली जात आहे.

⚖️ अवैध धंद्यांवर मोठा प्रहार
गेल्या दहा दिवसांत दोन POCSO अंतर्गत गुन्ह्यांची नोंद झाली असून तपास वेगाने सुरू आहे.
पोलिस निरीक्षक रणजित गलांडे यांनी एका हॉटेलवर पीटा अंतर्गत कारवाई करत गणेश कानडे व त्याच्या साथीदारावर गुन्हा दाखल केला. संबंधित आरोपीस वर्षभर जामीन मिळत नसल्याची माहिती समोर येत आहे.
वेश्या व्यवसाय चालवणाऱ्या हॉटेल्स सील करण्याची प्रक्रिया सुरू असून अवैध धंदे पूर्णपणे बंद करण्याचा पोलिसांचा निर्धार आहे.

👮‍♂️
“गुन्हेगारीला थारा नाही” — पोलीस उपविभागीय अधिकारी अमोल भारती
शिर्डी विभागाचे पोलीस उपविभागीय अधिकारी अमोल भारती यांनी स्पष्ट शब्दांत इशारा दिला आहे की, “शिर्डीत येणाऱ्या भाविकांच्या सुरक्षिततेशी तडजोड सहन केली जाणार नाही. गुन्हेगारी करणाऱ्यांवर कठोर कारवाई केली जाईल.”
त्यांच्या नेतृत्वाखाली नुकतीच देहव्यापार प्रकरणात मोठी कारवाई करण्यात आली. संशयित ठिकाणांवर छापे, अचानक तपासणी, सीसीटीव्ही पडताळणी आणि गुप्त माहितीच्या आधारे ऑपरेशन राबवले जात आहे.

अमोल भारती यांच्या सक्रिय भूमिकेमुळे शिर्डीत कायदा व सुव्यवस्थेचा धाक निर्माण झाला असून अवैध धंदे करणाऱ्यांमध्ये भीतीचे वातावरण आहे.
त्यांनी सर्व हॉटेल व्यावसायिक, एजंट आणि दुकानदारांना स्पष्ट सूचना दिल्या आहेत की, नियमांचे उल्लंघन केल्यास थेट गुन्हा दाखल करून परवाने रद्द करण्याची कारवाई करण्यात येईल.

🚔 शिर्डी पोलिस स्टेशन पूर्णपणे अलर्ट
अतिरिक्त पोलीस बळामुळे शिर्डी पोलिस प्रशासन आता पूर्णपणे अ‍ॅक्शन मोडमध्ये आले आहे. दिवस-रात्र गस्त, संशयितांवर नजर, गुन्हेगारांची पडताळणी आणि अवैध व्यवसायांवर छापेमारी सुरू आहे.
ग्रामस्थ आणि भाविकांनी या कारवाईचे स्वागत केले असून शिर्डीत सुरक्षिततेबाबत समाधानाचे वातावरण निर्माण झाले आहे.