शिर्डी (प्रतिनिधी) :
राहाता येथील एका पतसंस्थेच्या शाखेत कथित बोगस खाती उघडून कोट्यवधी रुपयांचे संशयास्पद आर्थिक व्यवहार केल्याप्रकरणी गुन्हा दाखल असलेला आरोपी अशोक खरात याला शिर्डी पोलिसांनी नाशिक मध्यवर्ती कारागृहातून न्यायालयाच्या परवानगीनंतर ताब्यात घेतले आहे. त्याला पुढील तपासासाठी शिर्डी पोलीस ठाण्यात आणण्यात आले असून पोलिसांकडून कसून चौकशी सुरू आहे.
या प्रकरणात बनावट कागदपत्रांच्या आधारे अनेक व्यक्तींच्या नावाने खाती उघडण्यात आल्याचा आरोप आहे. या खात्यांमधून मोठ्या प्रमाणावर आर्थिक व्यवहार झाल्याची माहिती तपासात पुढे आल्यानंतर शिर्डी पोलिसांनी अशोक खरात, संबंधित शाखा व्यवस्थापक तसेच इतर संबंधितांविरुद्ध गुन्हा दाखल केला होता.
तपासादरम्यान अनेक खातेदारांचे जबाब नोंदविण्यात आले असून, काहींनी “आमच्या नावाने खाते उघडल्याची आम्हाला कोणतीही माहिती नव्हती,” असा दावा केला आहे. त्यामुळे संबंधित कागदपत्रे, केवायसी प्रक्रिया, स्वाक्षऱ्या, ओळखपत्रे आणि आर्थिक व्यवहारांची सखोल पडताळणी सुरू आहे.
अशोक खरात पोलिसांच्या ताब्यात आल्याने या प्रकरणाला आता निर्णायक वळण मिळण्याची शक्यता व्यक्त होत आहे. बोगस खाती उघडण्यामागील नेमका सूत्रधार कोण? आर्थिक व्यवहारांचा अंतिम लाभार्थी कोण? या प्रकरणात आणखी कोणाची नावे समोर येणार? या सर्व प्रश्नांची उत्तरे आता पोलिस तपासातून समोर येण्याची शक्यता आहे.
या प्रकरणात आणखी काही जणांच्या भूमिकेचीही चौकशी सुरू असल्याची माहिती मिळत असून, तपासात नवीन धागेदोरे मिळाल्यास आणखी कारवाई होण्याची शक्यता नाकारता येत नाही. त्यामुळे संपूर्ण तालुक्याचे लक्ष आता शिर्डी पोलिसांच्या पुढील तपासाकडे लागले आहे.
