पंढरपुरातील चंद्रभागेत अनेक भाविक स्नानासाठी येतात. अशाच स्नानासाठी आलेले ६ जण चंद्रभागेत बुडत होते. नदीत बुडणाऱ्या ६ जणांना वाचवण्यात आलं आहे.
भाविक चंद्रभागा नदीत बुडत असताना त्यांचा जीव थोडक्यात वाचवण्यात आला आहे. प्रशासनाने नेमलेल्या कोळी बांधवांनी या ६ भाविकांना बुडत असताना नदीतून योग्यवेळी बाहेर काढून वाचवलं आहे. चंद्रभागेत स्नानाला जाणाऱ्या भाविकांना नदीतील पाण्याचा अंदाज न आल्याने ते चंद्रभागेत बुडू लागले होते.
त्याचवेळी कोळी बांधवांनी त्यांना पाण्यातून बाहेर काढत त्यांचा जीव वाचवला.उजनी धरणातून मोठ्या प्रमाणात पाण्याचा विसर्ग केला जात आहे. पाण्याचा विसर्ग केल्याने चंद्रभागा नदीच्या पाणी पातळीत वाढ झाली आहे. त्यामुळे पंढपुरात चंद्रभागा नदीत उतरताना भाविकांना काळजी घेण्याचं आवाहन प्रशासनाकडून करण्यात आलं आहे.
पंढपुरात अनेक भाविक विठुरायाच्या दर्शनासाठी दाखल होत आहे. विठ्ठलाच्या दर्शनाआधी अनेकजण चंद्रभागेत स्नान करतात. अशावेळी नदीतील पाण्याच्या पातळीचा अंदाज न आल्याने आतापर्यंत काही भाविकांना आपला जीव गमवावा लागला आहे. दोन दिवसांपूर्वी २१ जून रोजी एका तरुण भाविकाचा चंद्रभागा नदीच्या पात्रात बुडून मृत्यू झाल्याची दुर्दैवी घटना घडली होती.
