शिर्डी :
देश-विदेशातील कोट्यवधी साईभक्तांच्या श्रद्धेचे केंद्र असलेल्या श्री साईबाबांच्या चरणी भक्त आपल्या कुवतीनुसार विविध प्रकारचे दान अर्पण करून कृतज्ञता व्यक्त करतात. गुरुपौर्णिमा उत्सवाच्या पावन पर्वावर अशीच अढळ श्रद्धा आणि भक्तीची सुवर्ण साक्ष पाहायला मिळाली.
गुरुपौर्णिमा उत्सवाच्या प्रथम दिवशी, दि. २८ जुलै २०२६ रोजी, आंध्र प्रदेशातील एलुरु येथील दानशूर साईभक्त श्री. एम. श्रीनिवास राव यांनी श्री साईबाबांच्या चरणी ६२९ ग्रॅम वजनाचा आकर्षक नक्षीकाम असलेला सुवर्ण मुकुट भक्तिभावाने अर्पण केला. \
या सुवर्ण मुकुटाचे देणगी मूल्य सुमारे ₹८२ लाख ३९ हजार २७१ असून, ही देणगी श्री साईबाबांवरील त्यांच्या अढळ श्रद्धेचे आणि निस्सीम भक्तीचे जिवंत प्रतीक ठरली आहे.
या प्रसंगी श्री साईबाबा संस्थानचे मुख्य कार्यकारी अधिकारी गोरक्ष गाडीलकर यांनी दानशूर साईभक्त श्री. एम. श्रीनिवास राव यांचा शाल, श्रीफळ व सन्मानचिन्ह देऊन सत्कार केला.
श्री साईबाबांनी दिलेला “श्रद्धा आणि सबुरी” हा अमूल्य संदेश आजही लाखो भक्तांच्या जीवनाला दिशा देत आहे. त्याच संदेशाने प्रेरित होऊन भाविक श्रींच्या चरणी केवळ सुवर्ण-रौप्य नव्हे, तर आपल्या मनातील अपार श्रद्धा, विश्वास आणि समर्पण अर्पण करत असतात. गुरुपौर्णिमेच्या पावन पर्वावर अर्पण करण्यात आलेला हा सुवर्ण मुकुटही अशाच निस्वार्थ भक्तीचा आणि श्री साईबाबांवरील अखंड विश्वासाचा तेजस्वी आविष्कार ठरला.
