शिर्डी | प्रतिनिधी
राहाता तालुकास्तरीय शालेय व्हॉलीबॉल क्रीडा स्पर्धेत श्री साईबाबा संस्थान विश्वस्तव्यवस्था, शिर्डी संचलित श्री साईबाबा इंग्लिश मिडीयम स्कूलने दमदार क्रीडा कौशल्याचे दर्शन घडवत उल्लेखनीय यश संपादन केले. १७ वर्षांखालील मुलांच्या संघाने स्पर्धेत प्रथम क्रमांक पटकावत जिल्हास्तरीय स्पर्धेसाठी दिमाखात पात्रता मिळवली आहे. तर १७ वर्षांखालील मुलींच्या संघाने तृतीय क्रमांक मिळवला.
राहाता तालुका क्रीडासमिती व जिल्हा क्रीडाधिकारी कार्यालय, अहिल्यानगर यांच्या संयुक्त विद्यमाने दि. २१ ते २३ सप्टेंबरदरम्यान या स्पर्धेचे आयोजन करण्यात आले होते. १४, १७ व १९ वर्षे वयोगटातील मुला-मुलींच्या गटात तब्बल ९८ संघांनी सहभाग नोंदविला.
स्पर्धेसाठी चार सुसज्ज व्हॉलीबॉल मैदाने उपलब्ध करून देण्यात आली होती. महाराष्ट्र व्हॉलीबॉल असोसिएशनचे मान्यताप्राप्त पंच तसेच नियोजनबद्ध व्यवस्थेमुळे स्पर्धेला दर्जेदार स्वरूप प्राप्त झाले.
या स्पर्धेत श्री साईबाबा इंग्लिश मिडीयम स्कूलच्या १७ वर्षांखालील मुलांच्या संघाने उत्कृष्ट सांघिक खेळाचे प्रदर्शन करत प्रथम क्रमांकावर आपले नाव कोरले. या विजयामुळे संघाची जिल्हास्तरीय स्पर्धेसाठी निवड झाली आहे. मुलींच्या संघानेही उत्कृष्ट कामगिरी करत तृतीय क्रमांक पटकावला.
या यशामागे क्रीडा शिक्षक राजेंद्र कोहोकडे व महादू चांडे यांचे मार्गदर्शन लाभले.
विद्यार्थ्यांच्या या उल्लेखनीय क्रीडा कामगिरीबद्दल श्री साईबाबा संस्थानचे मुख्य कार्यकारी अधिकारी गोरक्ष गाडीलकर (भा.प्र.से.), उपमुख्य कार्यकारी अधिकारी भीमराज दराडे, प्रशासकीय अधिकारी अतुल वाघ, प्राचार्या कु. स्वप्ना जगताप, मुख्याध्यापिका शिल्पा पुजारी तसेच सर्व शिक्षकांनी विजेत्या खेळाडूंचे अभिनंदन केले. आगामी जिल्हास्तरीय स्पर्धेसाठी संघाला शुभेच्छा देण्यात आल्या.
