शिर्डी | प्रतिनिधी
श्री साईबाबांवर देश-विदेशातील लाखो भाविकांची अढळ श्रद्धा असून, भक्तिभावाने साईचरणी विविध स्वरूपात दान अर्पण करण्याची परंपरा आजही अखंड सुरू आहे. याच श्रद्धेतून पुणे येथील साईभक्त श्री. विकास ताराचंद चोपकर यांनी गुरुवारी, दि. १० सप्टेंबर २०२६ रोजी श्री साईबाबांच्या चरणी तब्बल ९० ग्रॅम ९७० मिलीग्रॅम वजनाचा आकर्षक नक्षीकाम केलेला सुवर्ण मुकुट अर्पण केला.
या सुवर्ण मुकुटाची अंदाजे देणगीमूल्य १२ लाख ८२ हजार ४९५ रुपये इतके आहे. अत्यंत आकर्षक नक्षीकाम असलेला हा सुवर्ण मुकुट साईभक्ती, श्रद्धा आणि समर्पणाचे अनमोल प्रतीक ठरला आहे.
श्री साईबाबांच्या चरणी आपली श्रद्धा अर्पण करण्याच्या भावनेतून चोपकर यांनी केलेल्या या देणगीबद्दल श्री साईबाबा संस्थानच्या वतीने त्यांचा गौरव करण्यात आला. संस्थानचे मुख्य कार्यकारी अधिकारी गोरक्ष गाडीलकर यांनी साईभक्त श्री. विकास ताराचंद चोपकर यांचा सत्कार करून त्यांच्या भक्तिभावाचे कौतुक केले.
साईबाबांच्या चरणी अर्पण करण्यात आलेल्या या सुवर्ण मुकुटामुळे “श्रद्धा आणि सबुरी” या साईबाबांच्या संदेशाची प्रचिती पुन्हा एकदा आली असून, देशभरातील साईभक्तांसाठी ही देणगी भक्तीचे प्रेरणादायी उदाहरण ठरली आहे.
