शिर्डी, दि. १० (प्रतिनिधी) – शिर्डी पोलीस स्टेशनच्या जनरल ड्यूटी पोलीस विकी विजय त्रिभुवन यांनी सांगितले की, दि. 10/09/2025 रोजी रात्री सुमारे 9:00 वा. त्यांनी आणि सपोनि अमित वाळके, पोलीस स्टेशन येथे हजर असताना, पोलीस निरीक्षक रणजित गलांडे यांनी त्यांना कळविले की, डी-मार्ट जवळील दक्षिणेकडील मोकळ्या जागेत दोन युवक मादक पदार्थाचे सेवन करत आहेत.
सदर घटनेची माहिती मिळाल्यानंतर, सपोनि वाळके यांनी दोन्ही युवकांना ताब्यात घेण्यासाठी दोन पंचांना बोलावून आणण्यास सांगितले. पंचांच्या उपस्थितीत पोलीस पथक आणि पंचांनी सदर युवकांचे निरीक्षण केले.
यावेळी दोन्ही युवक एका हातात कागदी चिलीम घेऊन धुम्रपान करीत होते, तोंड आणि नाकातून धूर सोडत, त्यांची ही क्रिया वारंवार चालू होती. त्यांनी पळून जाण्याचा प्रयत्न केला, पण पोलीस पथकाने त्यांना जागेवरच ताब्यात घेतले.
सदर युवकांनी स्वतःची ओळख दिली:
- आकाश बाळु कोपळघट, वय 22, रा. लक्ष्मीनगर, कोपरगाव (सध्या रा. पानमळा शिर्डी)
- संतोष महिंद्र पासवान, वय 25, रा. साकुरी शिव कोते वस्ती, शिर्डी
त्यांच्याकडे असलेले अंमली पदार्थ व सेवनासाठी साहित्य (कागदी चिलीम, आगपेटी) पंचांसमक्ष नष्ट करण्यात आले आणि पंचनामा तयार झाला.
यानंतर दोन्ही युवकांना राहाता ग्रामीण रुग्णालयात तपासणीसाठी नेले असता, गांजा सेवन झाल्याचे पुष्टी झाले.
पोलीस अधिकाऱ्यांनी सांगितले की, ही कारवाई अंमली पदार्थ विरोधी कायद्यानुसार करण्यात आली असून, भविष्यात अशा प्रकरणांवर कडक कारवाई केली जाईल
