शिर्डी (साई दर्शन न्यूज) – केंद्रीय कृषी व शेतकरी कल्याण मंत्री मा. ना. श्री. शिवराजसिंह चौहान व त्यांच्या पत्नी सौ. साधना सिंह चौहान यांचे शिर्डी दौऱ्यादरम्यान भाजपाचे नेते डॉ. राजेंद्र पिपाडा यांनी आगळ्या-वेगळ्या पद्धतीने स्वागत केले.
डॉ. राजेंद्र पिपाडा यांनी त्यांच्या स्वतःच्या पेरू बागेतील ताजे, सेंद्रिय पेरू भेट स्वरूपात देत केंद्रीय कृषिमंत्र्यांचा सत्कार केला. शेतकरी आणि शेतीशी नाते जपणाऱ्या या स्वागतामुळे उपस्थितांमध्ये विशेष चर्चा रंगली होती. कृषिमंत्री शिवराजसिंह चौहान यांनीही या साध्या पण अर्थपूर्ण स्वागताचे मनापासून कौतुक केले.
यावेळी RPI चे नेते दिलीपराव वाघमारे, प्रगतशील शेतकरी शिवाजीराव आनप, निखिल पिपाडा, साहिल पिपाडा, श्रुती पिपाडा व ट्विंकल पिपाडा यांच्यासह अनेक मान्यवर उपस्थित होते. सर्वांनी केंद्रीय मंत्र्यांशी संवाद साधत शेती, शेतकरी आणि ग्रामीण विकासासंदर्भात विचारांची देवाणघेवाण केली.
शेतीप्रधान भारतात शेतकऱ्यांच्या उत्पादनातून केलेले हे स्वागत शेतकऱ्यांचा सन्मान आणि कृषी संस्कृतीचे प्रतीक असल्याची भावना यावेळी व्यक्त करण्यात आली. या भेटीमुळे शिर्डीत राजकीय तसेच सामाजिक वर्तुळात सकारात्मक चर्चा पाहायला मिळाली.
