शिर्डी : नवनिर्वाचित राज्यसभा खासदार ज्योती वाघमारे यांनी आज शिर्डीत येऊन श्री साईबाबांच्या समाधीचे भक्तिभावाने दर्शन घेतले. साई समाधी मंदिरात प्रवेश करताच त्यांनी साईंच्या चरणी नतमस्तक होत देशातील सुख-शांती, विकास आणि जनतेच्या कल्याणासाठी प्रार्थना केली. त्यांच्या भेटीदरम्यान मंदिर परिसरात भक्तिमय वातावरण अनुभवायला मिळाले.
दर्शनानंतर श्री साईबाबा संस्थानच्या वतीने मुख्य कार्यकारी अधिकारी गोरक्ष गाडीलकर (भा.प्र.से.) यांनी त्यांचा पारंपरिक पद्धतीने शाल, श्रीफळ आणि स्मृतिचिन्ह देऊन सन्मान केला. यावेळी संस्थानच्या कामकाजाबाबत तसेच साई भक्तांसाठी राबविण्यात येणाऱ्या विविध सुविधांबाबत थोडक्यात माहितीही देण्यात आली.
खासदार वाघमारे यांनी साईबाबांप्रती आपली श्रद्धा व्यक्त करत, “शिर्डी हे देशातील कोट्यवधी भक्तांचे श्रद्धास्थान आहे. येथे येऊन आत्मिक समाधान मिळते. साईंच्या आशीर्वादाने जनसेवा अधिक प्रभावीपणे करता येईल,” असे मत व्यक्त केले.
या प्रसंगी शिवसेनेचे बुलंदतोफ जिल्हाप्रमुख कमलाकर कोते पाटील, अनिल पवार, राहुल गोंदकर यांच्यासह मोठ्या संख्येने शिवसैनिक उपस्थित होते. कार्यकर्त्यांनी खासदार वाघमारे यांचे उत्साहात स्वागत केले. त्यांच्या भेटीमुळे साईनगरीत राजकीय आणि सामाजिक वर्तुळात चर्चांना उधाण आले असून, शिवसैनिकांमध्ये विशेष उत्साहाचे वातावरण पाहायला मिळाले.
