शिर्डी | प्रतिनिधी
साईबाबांच्या पवित्र शिर्डीत अवैध दारूविक्रीचा धंदा फोफावत असल्याचे पुन्हा एकदा समोर आले असून शिर्डी शहर पोलिसांनी पिंपळवाडी रोड परिसरातील हॉटेल न्यू सनराज येथे पहाटे छापा टाकून अवैध मद्यविक्री करणाऱ्या विकी मिसर याला रंगेहाथ पकडले आहे. या कारवाईत विदेशी मद्याचा साठा जप्त करण्यात आला असून आरोपीविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे.
पोलिसांना मिळालेल्या खात्रीशीर माहितीनुसार 15 जून रोजी पहाटे पोलिसांचे पथक थेट हॉटेल न्यू सनराज येथे धडकले. अचानक झालेल्या या कारवाईमुळे परिसरात एकच खळबळ उडाली. तपासणीदरम्यान विविध कंपन्यांच्या विदेशी मद्याच्या बाटल्या, बिअरचे टिन आणि इतर मद्यसाठा आढळून आला. जप्त मुद्देमालाची किंमत 15 हजार 224 रुपये इतकी आहे.
विशेष म्हणजे आरोपीकडे मद्यविक्रीचा कोणताही वैध परवाना नसल्याचे तपासात स्पष्ट झाले. त्यामुळे धार्मिक नगरीत खुलेआम सुरू असलेल्या या बेकायदेशीर धंद्याबाबत नागरिकांकडून संताप व्यक्त होत आहे.
शिर्डीत दररोज लाखो साईभक्त येत असताना काहीजण पैशांच्या हव्यासापोटी शहराची प्रतिमा मलीन करण्याचे काम करत आहेत. अशा अवैध व्यवसायांमुळे कायदा व सुव्यवस्थेचा प्रश्न निर्माण होण्याची शक्यता नाकारता येत नाही. त्यामुळे पोलिसांनी अशा धंदेवाल्यांविरोधात कठोर भूमिका घेतल्याचे दिसून येत आहे.
ही कारवाई पोलीस निरीक्षक रणजित गलांडे यांच्या मार्गदर्शनाखाली निवांत जाधव, सागर काळे, राठोड व शिर्डी शहर पोलिसांच्या पथकाने केली. प्रकरणाचा पुढील तपास सुरू आहे.
छे दारूबंदी फक्त कागदावरच?
साईबाबांच्या शिर्डीत 1985 साली ग्रामसभेच्या ठरावाद्वारे कायमस्वरूपी दारूबंदी लागू करण्यात आली होती. साईबाबांच्या विचारांना अनुसरून व्यसनमुक्त आणि पवित्र वातावरण राखण्याचा त्यामागील उद्देश होता. मात्र आज वास्तव चित्र वेगळेच दिसत आहे. शहरातील विविध भागांमध्ये अवैधरित्या मद्यविक्री होत असल्याच्या तक्रारी वारंवार समोर येत आहेत.
पोलिसांकडून अधूनमधून कारवाया होत असल्या तरी अवैध दारूविक्रीचे जाळे पूर्णपणे मोडीत निघालेले दिसत नाही. त्यामुळे “शिर्डीतील दारूबंदी केवळ कागदावरच उरली आहे का?” असा सवाल नागरिक उपस्थित करत आहेत. साईनगरीची पवित्रता अबाधित राखण्यासाठी अवैध मद्यविक्री करणाऱ्यांवर सातत्याने आणि कठोर कारवाई करण्याची मागणी जोर धरत आहे.
