मध्यरात्रीच्या छाप्यात ‘तिरट’चा जुगार रंगात; ९ जण पोलिसांच्या जाळ्यात
शिर्डी पोलीस स्टेशनच्या पथकाने सावळीविहीर (ता. राहाता) येथील शिवारात गट क्रमांक ४२ मधील पत्र्याच्या शेडवर मध्यरात्री धाड टाकून मोठा जुगार अड्डा उद्ध्वस्त केला. महाराष्ट्र जुगार प्रतिबंधक कायदा कलम ४, ५ व १२(३) अन्वये ९ आरोपींविरुद्ध गुन्हा दाखल करण्यात आला असून सुमारे पाच लाख रुपयांचा मुद्देमाल जप्त करण्यात आला आहे.
कोकमठाण येथील ९ आरोपींविरुद्ध गुन्हा
या प्रकरणातील आरोपींमध्ये उत्तम कचेश्वर रक्ताटे (४७), रमेश भिमराज मगर (५७), कैलास जयराम लोंढे (५७), रामदास मारुती रक्ताटे (६१), भास्कर विश्वनाथ रोहम (५८), भिमराज भाऊसाहेब घोरपडे (४५), चंद्रभान भिमराज फटांगरे (४७), प्रभाकर सुखदेव निकम (६९) आणि भाऊसाहेब कचेश्वर जपे (५५) यांचा समावेश आहे. सर्व आरोपी हे जंगली महाराज आश्रमामागे, कोकमठाण (ता. कोपरगाव, जि. अहिल्यानगर) येथील रहिवासी आहेत.
जागामालकाच्या ठिकाणी सुरू होता हार-जीतीचा फड
पोलीसांना मिळालेल्या गोपनीय माहितीनुसार आरोपी क्रमांक १ ते ८ हे आरोपी क्रमांक ९ भाऊसाहेब जपे यांच्या जागेत ५२ पत्त्यावरील ‘तिरट’ नावाचा हार-जीतीचा जुगार खेळत होते. माहितीची खातरजमा झाल्यानंतर पोलीस निरीक्षक रणजित गलांडे यांच्या मार्गदर्शनाखाली पथकाने छापा टाकला आणि सर्वांना रंगेहाथ पकडले.
जुगार अड्ड्यांवर पोलिसांचा वचक; परिसरात खळबळ
या कारवाईत पोलीस निरीक्षक रणजित गलांडे, पोलीस उपनिरीक्षक सागर काळे, निवांत जाधव आणि इतर कर्मचाऱ्यांनी सहभाग घेतला. ग्रामीण भागात शेतजमिनी व एकांतस्थळी सुरू असलेल्या अवैध जुगार अड्ड्यांवर पोलिसांनी कारवाईचा बडगा उगारल्याने जुगार व्यवसाय करणाऱ्यांमध्ये खळबळ उडाली आहे.
