शिर्डी | प्रतिनिधी
श्री साईबाबांच्या पावन शिर्डीत भाविकांच्या श्रद्धेचा गैरफायदा घेत पूजेच्या साहित्याच्या नावाखाली बनावट वस्तू विक्रीचा धक्कादायक प्रकार उघडकीस आला आहे. हरतालिका पूजेसाठी विक्री करण्यात येणाऱ्या साहित्यात चक्क प्लास्टिकचे बदाम आढळून आल्याने खळबळ उडाली असून, या प्रकरणी शिर्डी पोलीस ठाण्यात चौघांविरुद्ध गुन्हा दाखल करण्यात आला आहे.
गणेशोत्सव आणि हरतालिका पूजेच्या पार्श्वभूमीवर शिर्डी शहरात पूजेच्या साहित्याची मोठ्या प्रमाणावर विक्री सुरू आहे. याच दरम्यान नगरपरिषदेच्या कर्मचाऱ्याला पूजेचे साहित्य खरेदी करताना संबंधित प्रकार निदर्शनास आला. पूजेच्या साहित्यामध्ये संशयास्पद वस्तू आढळल्याने तत्काळ वरिष्ठ अधिकाऱ्यांना माहिती देण्यात आली.
यानंतर शिर्डी नगरपरिषदेच्या अतिक्रमण विभागासह एमएसएफ कर्मचाऱ्यांनी संबंधित दुकानांमध्ये तपासणी केली. प्रकरणाचे गांभीर्य लक्षात घेऊन पुढील कारवाई करण्यात आली आणि अखेर शिर्डी पोलीस ठाण्यात गुन्हा दाखल करण्यात आला.
श्रद्धेच्या नावावर बनावटपणाचा बाजार?
पूजेचे साहित्य म्हणजे केवळ विक्रीची वस्तू नव्हे, तर भाविकांच्या श्रद्धेशी जोडलेला विषय आहे. अशा साहित्यामध्ये बनावट वस्तूंचा वापर करून त्याची विक्री केली जात असल्याचा आरोप समोर येणे ही गंभीर बाब आहे.
भाविक श्रद्धेने पूजेचे साहित्य खरेदी करतो; त्याच्या श्रद्धेची फसवणूक करण्याचा अधिकार कोणालाही नाही!
विशेष म्हणजे शिर्डीत देशाच्या कानाकोपऱ्यातून भाविक येतात. त्यामुळे या प्रकरणामागे केवळ एखादे दुकान आहे की बनावट साहित्य पुरविणारी मोठी साखळी कार्यरत आहे, याचा तपास होणे गरजेचे आहे.
चौघांविरुद्ध पोलिसांत गुन्हा
या प्रकरणात मोहम्मद हनीफ पठाण (रुई), रियाज इकबाल पठाण, रफीक सरदार मणियार आणि मासूम मणियार यांच्याविरुद्ध शिर्डी पोलीस ठाण्यात गुन्हा दाखल करण्यात आला आहे. संबंधित आरोपींची भूमिका, पूजेच्या साहित्याचा स्रोत आणि त्यामागील पुरवठा साखळी याबाबत पोलिसांकडून तपास करण्यात येत आहे.
फक्त दुकानदार नव्हे, पुरवठादारही शोधा!
बनावट साहित्य एखाद्या दुकानात आढळले म्हणजे प्रकरण तेथेच संपत नाही. हे साहित्य कोठून आले, कोणी पुरविले, किती प्रमाणात विक्री झाले आणि आणखी कोणत्या दुकानांमध्ये त्याचा पुरवठा झाला, याचा तपास होणे आवश्यक आहे.
नगरपरिषद आणि पोलिस प्रशासनाने शहरातील पूजेच्या साहित्याच्या दुकानांची व्यापक तपासणी करून भाविकांची फसवणूक करणाऱ्या संपूर्ण साखळीवर कारवाई करावी, अशी मागणी होत आहे.
साईनगरीत श्रद्धेशी खेळ सहन करणार नाही!
शिर्डी ही श्रद्धेची जागतिक राजधानी म्हणून ओळखली जाते. अशा पवित्र भूमीत भाविकांच्या श्रद्धेचा गैरफायदा घेऊन कोणी आर्थिक फायदा मिळवत असेल, तर त्यांच्यावर कठोर कारवाई होणे गरजेचे आहे.
श्रद्धा विक्रीचा माल नाही आणि भाविकांची आस्था कमाईचे साधन नाही!
या प्रकरणाच्या सखोल तपासातून दोषींची संपूर्ण साखळी समोर आणून कायद्यानुसार कठोर कारवाई करावी, अशी मागणी भाविकांकडून होत आहे.
साईनगरीत श्रद्धेचा सौदा चालणार नाही!
पूजेच्या साहित्यात बनावट वस्तूंचा वापर होत असल्याचा प्रकार समोर येऊन त्याप्रकरणी गुन्हाही दाखल झाला आहे. त्यामुळे प्रशासनाने आता केवळ कारवाईचा देखावा न करता बनावट साहित्याचा मूळ स्रोत शोधून संपूर्ण साखळीवर हातोडा मारावा. भाविकांच्या श्रद्धेशी खेळ करणाऱ्यांना कायद्याचा धाक दाखवणे हीच खरी साईसेवा ठरेल.
