
राहता : शहरात एक अत्यंत धक्कादायक घटना उघडकीस आली असून, कामधंदा करत नसल्याबाबत वारंवार जाब विचारल्याच्या रागातून मुलाने आपल्या ६५ वर्षीय वडिलांची निर्घृण हत्या केल्याची घटना घडली आहे. या घटनेमुळे राहता परिसरात प्रचंड खळबळ उडाली आहे.
मिळालेल्या माहितीनुसार, मयत उत्तम लक्ष्मण खैरे (वय ६५, रा. घोलप मंगल कार्यालयाजवळ, राहता) हे आपल्या मुलगा सचिन उत्तम खैरे याला कामधंदा करत नसल्याबद्दल नेहमी विचारणा करत होते. “काम का करत नाहीस, पैसे का कमवत नाहीस” असा जाब ते वारंवार विचारत असल्याने आरोपीच्या मनात राग साचला होता.
दि. २४ एप्रिल २०२६ रोजी सायंकाळी साडेसात वाजण्याच्या सुमारास राहत्या घरासमोरील अंगणात या वादाने उग्र रूप धारण केले. संतापाच्या भरात आरोपी सचिन खैरे याने आपल्या वडिलांना लाथाबुक्क्यांनी बेदम मारहाण केली. त्यानंतर जवळच असलेल्या फरशीने डोक्यावर व शरीरावर गंभीर प्रहार केले. या भीषण मारहाणीत उत्तम खैरे यांचा जागीच मृत्यू झाला.
घटनेची माहिती मिळताच राहता पोलिस ठाण्याचे पथक घटनास्थळी दाखल झाले. या प्रकरणी गुन्हा रजिस्टर नंबर १४७/२६ नुसार भारतीय न्याय संहिता (BNS 2023) कलम १०३(१) व ११५(२) अन्वये गुन्हा दाखल करण्यात आला आहे. पोलिसांनी आरोपी सचिन खैरे याला ताब्यात घेतले आहे.
घटनेचे गांभीर्य लक्षात घेऊन श्रीरामपूर विभागाचे उपविभागीय पोलीस अधिकारी जयदत्त भवर, राहता पोलिस ठाण्याचे पोलीस निरीक्षक नितीन चव्हाण यांनी घटनास्थळी भेट देत तपासाच्या सूचना दिल्या. मृतदेह शवविच्छेदनासाठी राहता ग्रामीण रुग्णालयात पाठविण्यात आला आहे. पुढील तपास महिला पोलीस उपनिरीक्षक कोमल कुमावत्या करत आहेत.
दरम्यान, केवळ भविष्यासाठी काळजीपोटी कामाबाबत विचारणा करणाऱ्या वडिलांची मुलानेच हत्या केल्याने राहता शहरात हळहळ व्यक्त केली जात आहे.

