आज सायंकाळी साधारण आठ वाजेच्या सुमारास, साईदर्शन आटोपून भक्त निवासाकडे जात असलेल्या आंध्रप्रदेशातील दोन महिला साईभक्तांना चोरट्यांनी लक्ष्य केलं.
नगर-मनमाड रस्त्यावरील ५०० रूम परिसरात ही घटना घडली.
मोटारसायकलवरून आलेल्या दोन चोरट्यांनी धुम स्टाईलने या दोन्ही महिलांच्या गळ्यातील सोन्याच्या चैन ओरबाडल्या आणि घटनास्थळावरून पोबारा केला.
या सोन्याच्या चैनची अंदाजे किंमत चार लाख रुपये असल्याची माहिती समोर आली आहे.
या घटनेनंतर दोन्ही महिला साईभक्त प्रचंड घाबरल्या आणि ढसाढसा रडू लागल्या.
घटनेची माहिती मिळताच शिर्डी पोलिसांनी तात्काळ घटनास्थळी धाव घेतली. पोलिसांनी घटनेची माहिती घेतल्यानंतर पुढील प्रक्रियेसाठी दोन्ही महिलांना शिर्डी पोलीस ठाण्यात नेण्यात आलं.
दरम्यान, वर्दळीच्या ठिकाणी ही घटना घडल्याने घटनास्थळी नागरिकांची मोठी गर्दी झाली होती.
चैन स्नॅचिंग करणाऱ्या या चोरट्यांचा शोध घेण्यासाठी शिर्डी पोलीस तपास करत आहेत.
साईभक्तांच्या सुरक्षेचा प्रश्न पुन्हा एकदा ऐरणीवर आला असून, या घटनेमुळे परिसरात खळबळ उडाली आहे..
