दमदाटी करत तरुणांकडून मोबाईल अन् पैसे घेऊन भर दिवसा भामट्यांनी केला पोबारा..!

काल भर सकाळी साडे दहाच्या सुमारास साई मंदिराच्या लगत भर वर्दळीच्या ठिकाणी एका हॉटेल मध्ये काम करणाऱ्या तरुणाला रस्त्यात अडवून चक्क जादू दाखवतो असे म्हणत आधी बोलण्यात गुंतवले व दमदाटी करून त्याच्याकडील मोबाईल आणि पैसे घेऊन एका भामट्याने पोबारा केल्याची खळबळजनक घटना घडल्याने आश्चर्य व्यक्त होत आहे

शिर्डी शहरात गेल्या अनेक दिवसांपासून पोलिस प्रशासन आणि श्री साईबाबा संस्थानच्या सुरक्षा विभागाने जोरदार कामगिरी करत छोट्या छोट्या चोऱ्या, पाकिटमारी आणि भाविकांच्या फसवणुकीच्या घटनांना बऱ्यापैकी आळा घातल्याचे चित्र आहे मात्र आता ह्या भामट्यांनी अनोखी शक्कल लढवत रस्त्याने जाणाऱ्या एकट्या दुकट्या व्यक्तीला अडवून हात चलाखी करत प्रसंगी दमदाटी करत लुबडण्याचे प्रकार होत असल्याने प्रशासनाने या गंभीर प्रकाराकडे विशेष लक्ष घालत दिवसा ढवळ्या यंत्रणेला आव्हान देत कार्यभाग साधणाऱ्या या अप प्रवृत्तीला आळा घालावा अशी मागणी आता पुढे येत आहे.

काल सकाळी साडे दहाच्या सुमारास साई मंदिर शेजारील जुन्या पिंपळवाडी रस्त्यावर नवीन दर्शन रांगेच्या पुलाखाली एक शिर्डीतील हॉटेल मध्ये कामाला असलेल्या मूळचा मध्यप्रदेश येथील तरुण गावावरून नुकताच आला अन् एक नंबर गेट जवळून आपल्या रूम कडे निघाला असताना एका 22 ते 25 वयोगटातील तरुणाने त्यास अडविले आणि तुला जादू दाखवतो असे म्हणत खाली पडलेला एक दगड त्याच्या हातात दिला आणि मूठ झाकून उघडल्यावर नकळतपणे हातचलाखी करत दगडाच्या जागी वीस रुपयांची नोट झाली आणि त्यानंतर बोलण्यात गुंतवून ठेवत भुरळ पाडून त्याचे पैसे आणि मोबाईल घेऊन सदर तरुणाने पोबारा केल्याचा अनोखा प्रकार घडल्याचे दीपक कुमार साहू याने साई न्यूज शी बोलतांना सांगितले दीपक ने सांगितलेल्या माहितीनुसार ज्या ठिकाणी ही घटना घडली त्या ठिकाणी सीसीटीव्ही कॅमेरे सुद्धा आहेत

याबाबत दीपक साहू हा शिर्डी पोलिस स्टेशन ला तक्रार देण्यास गेला असता त्यास मोबाईल आणि सिम गहाळ झाल्याचे प्रमाणपत्र देण्यात आले..

साईबाबा संस्थानच्या सुरक्षा विभागाशी या तरुणाने संपर्क केला असता सुरक्षेच्या कारणास्तव व कायदेशीर बाबींमुळे संस्थान प्रशासनाला सीसीटीव्ही फुटेज देता येत नसल्याने या तरुणाला न्याय मिळणार कसा आणि चक्क दिवसा भाविकांची आणि नागरिकांची लुटमार करणारे हे भामटे जेरबंद कसे होणार….हा सवाल आता उपस्थित होत असून असेच प्रकार साईबाबा संस्थान च्या रुग्णालय परिसरात आणि इतर ठिकाणी देखील झाल्याचे समजते..मात्र घटना घडली त्या सकाळी दहा ते अकरा दरम्यानचे सीसीटीव्ही फुटेज तपासून साईबाबा संस्थांनच्या सुरक्षा विभागाने तपासून आपल्या सध्या वेशातील सुरक्षा कर्मचाऱ्यांना याबाबत सतर्क करून या टोळीचा पर्दाफाश करावा अशी मागणी आता साईभक्त व नागरिकांमधून होत आहे