अहिल्यानगर, दि. २ : राज्यातील नगरपरिषद व नगरपंचायत निवडणुकांच्या मतमोजणीची तारीख बदलल्यानंतर जिल्ह्यातील ‘ड्राय डे’ची तारीखही बदलली आहे. ३ डिसेंबरऐवजी आता २१ डिसेंबर २०२५ रोजी संपूर्ण अहिल्यानगर जिल्ह्यात ‘ड्राय डे’ पाळला जाणार आहे. जिल्हाधिकारी डॉ. पंकज आशिया यांनी याबाबतचा सुधारित आदेश जारी केला आहे.
मतमोजणी पुढे ढकलली; ‘ड्राय डे’ची नवी तारीख निश्चित
उच्च न्यायालयाच्या आदेशानुसार नगरपरिषद व नगरपंचायत निवडणुकांची मतमोजणी पुढे ढकलण्यात आली असून नवी तारीख २१ डिसेंबर निश्चित झाली आहे. मतमोजणीदरम्यान कायदा-सुव्यवस्था सुरळीत राहावी म्हणून या दिवशी मद्यविक्री बंद ठेवण्याचे आदेश देण्यात आले आहेत.
या शहरांमध्ये मद्यविक्री पूर्णपणे बंद
२१ डिसेंबर रोजी खालील नगरपरिषद व नगरपंचायत क्षेत्रात सर्व प्रकारची मद्यविक्री बंद राहील :
संगमनेर, कोपरगांव, शिर्डी, राहाता, श्रीरामपूर, देवळाली प्रवरा, राहुरी, शेवगाव, पाथर्डी, जामखेड, श्रीगोंदा (नगरपरिषदा) व नेवासा नगरपंचायत.
देशी–विदेशी दारू दुकाने व बीअर बार बंद
या दिवशी—
सर्व देशी-विदेशी मद्यविक्री दुकाने
बीअर बार
पूर्णपणे बंद राहतील.
घाऊक विक्रेते व उत्पादकांना अटींसह सूट
घाऊक विक्री परवाना असलेले CL-2 / FL-1 परवाना धारक विक्रेते तसेच मद्य उत्पादकांना कार्यरत राहण्यास परवानगी असेल. मात्र, ‘ड्राय डे’ लागू असलेल्या क्षेत्रात कोणत्याही प्रकारचा मद्यपुरवठा करण्यास सक्त मनाई असणार आहे.
२१ डिसेंबरला मतमोजणीसोबतच अहिल्यानगर जिल्ह्यात कठोर ‘ड्राय डे’ची अंमलबजावणी होणार आहे.
