राहाता | प्रतिनिधी
राहाता येथील बसस्थानकात एसटी बस घेऊन आलेल्या चालक व वाहकाला लाथाबुक्क्यांनी मारहाण करून शिवीगाळ केल्याची धक्कादायक घटना उघडकीस आली आहे. या प्रकरणी राहाता पोलीस ठाणे येथे येवला पोलीस ठाण्यात नेमणुकीस असलेल्या हेडकॉन्स्टेबलसह चौघांविरुद्ध गुन्हा दाखल करण्यात आला आहे.
जनतेचे रक्षक समजल्या जाणाऱ्या पोलिसाकडूनच अशी वर्तणूक झाल्याने पोलीस खात्याची प्रतिमा मलिन होत असल्याची तीव्र चर्चा नागरिक व पोलीस वर्तुळात सुरू आहे.
🚌 शासकीय कर्तव्यात अडथळा; बसस्थानकात दहशत
फिर्यादी एसटी वाहक बालाजी पंडितराव बोरगावकर व चालक विकास बालाजी मुंढे यांनी दिलेल्या तक्रारीनुसार, रविवार दि. १ मार्च रोजी सायंकाळी साडेपाचच्या सुमारास एसटी बस (क्र. MH 24 AU 7970) राहाता बसस्थानकात आल्यानंतर वाद उफाळला.
येवला पोलीस ठाण्यातील हेडकॉन्स्टेबल फकीरा तोताराम थोरात, सार्थक संजय बनसोडे व त्यांच्या दोन साथीदारांनी शिवीगाळ करत चालक-वाहकाला लाथाबुक्क्यांनी बेदम मारहाण केल्याचा आरोप आहे.
⚠️ “मी पोलीस आहे…” म्हणत दमदाटी
फिर्यादीनुसार, आरोपी हेडकॉन्स्टेबलने केवळ एसटी कर्मचाऱ्यांनाच नव्हे, तर स्थानिक पोलिसांनाही दमदाटी केली.
“मी पोलीस आहे, तुमच्यावर तसेच पोलीस उपनिरीक्षक लेंडे व ठाणे अंमलदार बर्डे यांनाही कामाला लावून टाकेल, अॅट्रॉसिटीचा गुन्हा दाखल करेन,” अशी धमकी दिल्याचे नमूद आहे.
कायद्याचा रक्षकच कायद्याला आव्हान देतोय का? — असा संतप्त सवाल उपस्थित होत आहे.
⚖️ गुन्हा दाखल; कठोर कारवाईची मागणी
या प्रकरणी शासकीय कर्तव्यात अडथळा निर्माण केल्याप्रकरणी भारतीय दंड संहितेच्या कलम 132, 121(1), 351(2), 352 व 3(5) अन्वये गुन्हा दाखल करण्यात आला आहे. पुढील तपास पोउनि कुमावत करत आहेत.
घटनेनंतर एसटी कर्मचारी व नागरिकांकडून संबंधित पोलिस कर्मचाऱ्यावर तात्काळ निलंबन व विभागीय चौकशी करून कठोर कारवाई करण्याची मागणी होत आहे.
👉 “जनतेचे रक्षण करणाऱ्यांकडूनच अशी गुंडगिरी?” — राहाता शहरात संताप उसळला आहे.
जाहिरात
DN SPORTS
जाहिरात
