शिर्डी : सावळीविहीर खुर्द गावातील स्मशानभूमीच्या पाठीमागील काटवणात बसून पत्त्यांवर हारजीतीचा जुगार खेळणाऱ्या सात जुगाऱ्यांवर शिर्डी पोलिसांनी धडक कारवाई केली आहे. या कारवाईत जुगाराच्या डावातील रोख रक्कम व जुगाराचे एकूण ५२ पत्ते जप्त करण्यात आले असून सात जणांना ताब्यात घेण्यात आले आहे.
शिर्डी पोलीस स्टेशनचे पोलीस कर्मचारी सोमेश कैलास गरदास यांनी सरकारतर्फे दिलेल्या फिर्यादीनुसार, २६ ऑगस्ट २०२६ रोजी दुपारी सुमारे ३.३० वाजण्याच्या सुमारास शिर्डी पोलीस स्टेशनचे पोलीस निरीक्षक रणजित गलांडे यांना गोपनीय बातमीदाराकडून माहिती मिळाली होती. सावळीविहीर खुर्द गावातील स्मशानभूमीच्या पाठीमागील काटवणात काही व्यक्ती पत्त्यांवर हारजीतीचा जुगार खेळत असल्याची माहिती मिळाल्यानंतर पोलिसांनी तत्काळ कारवाईचे नियोजन केले.
पोलिसांच्या पथकाने पंचांसह घटनास्थळी जाऊन दुपारी सुमारे ४.३० वाजता छापा टाकला. यावेळी काही इसम हातात पत्ते घेऊन समोर पैसे ठेवून ‘तिरट’ नावाचा जुगार खेळत असल्याचे पोलिसांच्या निदर्शनास आले. पोलिसांनी अचानक छापा टाकून सर्वांना जागीच ताब्यात घेतले.
या कारवाईत रामकृष्ण कारभारी माळी (४२), किसन दगडू दारवंटे (४८), गणेश तात्याबा लकडे (३३), राजेंद्र शिवनाथ जाधव (४८), निलेश किसन इंगळे (३२), राजेंद्र दगडू दारवंटे (४५) आणि संदिप परसराम माळी (३१) या सात जणांना ताब्यात घेण्यात आले. सर्व आरोपी सावळीविहीर खुर्द, ता. राहाता येथील रहिवासी असल्याचे फिर्यादीत नमूद करण्यात आले आहे.
पोलिसांनी घटनास्थळाची झडती घेतली असता जुगाराच्या डावात ठेवलेली ३ हजार ४०० रुपयांची रोख रक्कम तसेच जुगारासाठी वापरण्यात आलेले ५२ पत्ते ताब्यात घेण्यात आले.
या कारवाईमुळे परिसरात उघड्यावर सुरू असलेल्या जुगाराच्या अड्ड्यांवर शिर्डी पोलिसांनी पुन्हा एकदा धडक कारवाई केल्याची चर्चा सुरू असून, पुढील कायदेशीर कारवाई शिर्डी पोलीस करीत आहेत.
