साईनगरीत दरवर्षी मोठ्या उत्साहात साजरा होणाऱ्या साई रामनवमी उत्सव २०२६ (वर्ष ११५ वे) निमित्त महत्वाची नियोजन बैठक जाहीर करण्यात आली आहे. समस्त शिर्डी ग्रामस्थ व श्री साईबाबा संस्थान ट्रस्ट विश्वस्त व्यवस्था, शिर्डी यांच्या संयुक्त विद्यमाने ही बैठक आयोजित करण्यात येत आहे.
🗓 रविवार, दि. १ मार्च २०२६
🕚 सकाळी ११:०० वा.
📍 स्थळ – हॉटेल द्वारका पार्क, नांदुख रोड, शिर्डी
उत्सवाचे नियोजन, विविध धार्मिक कार्यक्रमांची आखणी, पालखी सोहळा, कीर्तन, भजन, ध्वजारोहण, प्रसाद व्यवस्था, वाहतूक व सुरक्षा नियोजन यासंदर्भात या बैठकीत सविस्तर चर्चा होणार आहे. उत्सवाचे यंदाचे वर्ष ११५ वे असल्याने अधिक भव्य आणि शिस्तबद्ध आयोजनावर भर दिला जाणार असल्याची माहिती सूत्रांकडून मिळाली आहे.
ऐतिहासिक परंपरेचा उत्सव
साई रामनवमी हा शिर्डीतील अत्यंत महत्वाचा आणि ऐतिहासिक उत्सव मानला जातो. साईबाबा यांच्या काळापासून सुरू झालेली ही परंपरा आजही अखंड सुरू आहे. देश-विदेशातून लाखो भाविक या काळात शिर्डीत दाखल होतात. रामजन्मोत्सव, नामसप्ताह, पालखी मिरवणूक आणि विविध धार्मिक कार्यक्रमांमुळे संपूर्ण साईनगरी भक्तिमय वातावरणात न्हाऊन निघते.
दरम्यान, यंदाच्या उत्सव समितीच्या अध्यक्षपदासाठी स्थानिक शिर्डी ग्रामस्थ संजय भागवत शिंदे यांची निवड करावी, अशी मागणी माहिती अधिकार कार्यकर्ता महासंघ शिर्डीचे दिगंबर कोते यांनी केली आहे. “स्थानिक ग्रामस्थांना संधी दिल्यास उत्सव अधिक लोकसहभागातून आणि पारदर्शकतेने पार पडेल,” असे त्यांचे मत आहे.
ग्रामस्थांना उपस्थितीचे आवाहन
उत्सव समितीचे अध्यक्ष श्री. दिपक सोपानराव वारूळे यांनी सर्व ग्रामस्थ, सामाजिक संघटना, व्यापारी, स्वयंसेवक आणि साईभक्तांनी या महत्वाच्या बैठकीस उपस्थित राहून आपले मत मांडावे, असे आवाहन केले आहे. उत्सवाचे नियोजन हे सर्वांच्या सहभागातूनच यशस्वी होते, असा विश्वास त्यांनी व्यक्त केला.
साईनगरीतील या ऐतिहासिक रामनवमी उत्सवाच्या पार्श्वभूमीवर होणाऱ्या बैठकीकडे संपूर्ण शिर्डीकरांचे लक्ष लागले असून, येत्या काही दिवसांत उत्सवाची रूपरेषा स्पष्ट होण्याची शक्यता आहे.
॥ साई राम ॥
