शिर्डी | प्रतिनिधी
श्री साईबाबांवर देश-विदेशातील लाखो भाविकांची अढळ श्रद्धा आहे. या श्रद्धेतून भाविक आपल्या कुवतीनुसार श्री साईबाबांच्या चरणी विविध स्वरूपातील दान अर्पण करून आपली भक्ती व्यक्त करीत असतात. त्याच भक्तिभावातून दिल्ली येथील साईभक्त श्री. अमित बजाज यांनी श्री साईबाबांच्या चरणी आकर्षक नक्षीकाम असलेला चांदीचा मुकुट अर्पण केला.
या चांदीच्या मुकुटाचे वजन ७७७ ग्रॅम ६०० मिलीग्रॅम असून त्याचे देणगी मूल्य १ लाख ६३ हजार २९६ रुपये आहे. सुंदर नक्षीकामाने साकारलेला हा चांदीचा मुकुट साईभक्तीची अनोखी भावना व्यक्त करणारा ठरला.
श्री साईबाबांच्या चरणी अर्पण केलेल्या या भक्तीपूर्ण देणगीबद्दल श्री साईबाबा संस्थानच्या वतीने प्रशासकीय अधिकारी संदिपकुमार भोसले यांनी साईभक्त श्री. अमित बजाज यांचा सत्कार करून त्यांच्या भक्तिभावाचे कौतुक केले.
श्री साईबाबांच्या चरणी अर्पण होणारे प्रत्येक दान हे भाविकांच्या श्रद्धा, विश्वास आणि समर्पणाचे प्रतीक मानले जाते. दिल्ली येथील साईभक्त अमित बजाज यांनी अर्पण केलेला हा चांदीचा मुकुटही साईभक्तीच्या याच भावनेची सुंदर अनुभूती देणारा ठरला.
