शर्टच्या खिशात ठेवलेल्या मोबाइलचा अचानक स्फोट होऊन शुक्रवारी सायंकाळी एका शिक्षकाचा मृत्यू झाला. तर एक व्यक्ती जखमी झाली. अर्जुनी-मोरगाव तालुक्यातील सिरेगाव-सानगडी मार्गावरील केसलवाडा फाटा परिसरात शुक्रवारी सायंकाळी ६ वाजताच्या सुमारास ही घटना घडली. सुरेश भिकाजी संग्रामे (रा. टोला सिरेगाव) असे मृत शिक्षकाचे नाव आहे. तर नत्थू गायकवाड असे जखमी नातेवाइकाचे नाव आहे.
साकोली तालुक्यातील सानगडी येथे शुक्रवारी आठवडी बाजार होता. सुरेश संग्रामे आणि नत्थू गायकवाड हे दोघेही या बाजारासाठी गेले होते. बाजार करून परत गावी येत असताना सिरेगाव ते सानगडी मार्गावरील केसलवाडा फाटा परिसरात सुरेश यांच्या शर्टच्या वरच्या खिशात असलेल्या मोबाइलचा अचानक स्फोट झाला. त्यामुळे त्यांच्या छातीचा काही भाग जळाला. यात त्यांचा जागीच मृत्यू झाला. तर दुचाकीवर मागे बसलेले गायकवाड हे गाडीवरून खाली पडल्याने जखमी झाले. त्यांना उपचारासाठी भंडारा येथील रुग्णालयात दाखल करण्यात आले.
