🚨 शिर्डीत दोन ठिकाणी गांजाचे सेवन; चार तरुण गजाआड
शिर्डी शहरात अंमली पदार्थांविरोधात पोलिसांनी कारवाईचा धडाका लावला असून दोन वेगवेगळ्या ठिकाणी गांजाचे सेवन करताना चार तरुणांना रंगेहाथ पकडण्यात आले. तोंडावाटे धूर ओढून नाकावाटे सोडत चिलीमद्वारे गांजा सेवन करत असताना ही कारवाई करण्यात आली.
🔎 हॉटेल अभिषेक मागील काटवनात पहिली कारवाई
शिर्डी पोलीस स्टेशनच्या पथकाला मिळालेल्या माहितीनुसार सायंकाळी सुमारे ७ वाजता हॉटेल अभिषेक मागील काटवन परिसरात दोन तरुण गांजा सेवन करत असल्याची खबर मिळाली. पोलिस उपनिरीक्षक सागर काळे यांच्या मार्गदर्शनाखाली पथकाने पंचांसमक्ष छापा टाकला.
यावेळी
विशाल आण्णा अभंग (वय १९, रा. करडोबानगर, शिर्डी)
यश बाळकृष्ण मोरे (वय १९, रा. निमगाव, ता. राहाता)
हे दोघे चिलीममधून गांजा ओढताना आढळून आले. त्यांच्या ताब्यातून चिलीम व माचीस जप्त करून पंचांसमक्ष नष्ट करण्यात आले. ग्रामीण रुग्णालय राहाता येथे वैद्यकीय तपासणीत गांजा सेवन केल्याचे निष्पन्न झाले.
🌙 रात्री उशिरा दुसरी कारवाई; आणखी दोघे जेरबंद
याच दिवशी रात्री सुमारे ९.३० वाजता त्याच परिसरात दुसरी कारवाई करण्यात आली.
यावेळी
रामा अमोल माळी (वय १९, रा. गणेशवाडी, शिर्डी)
अनिल मच्छिंद्र माळी (वय २०, रा. निमगाव, ता. राहाता)
हे दोघे चिलीमद्वारे गांजाचा धूर तोंडातून ओढून नाकातून सोडताना आढळले. पंचनामा करून साहित्य जप्त करण्यात आले असून वैद्यकीय अहवालात गांजा सेवन केल्याची पुष्टी झाली आहे.
⚖️ एनडीपीएस कायद्यान्वये गुन्हा दाखल
चारही तरुणांविरुद्ध अंमली पदार्थ प्रतिबंधक कायद्यानुसार (NDPS Act) गुन्हा दाखल करण्यात आला असून पुढील तपास सुरू आहे. शिर्डी पोलिसांनी शहरात गांजा व इतर अंमली पदार्थांविरोधात कठोर कारवाईचा इशारा दिला आहे.
