शिर्डीत १७ सप्टेंबरला विशेष आधार व डाक सेवा शिबिरसन्मित्र युवक मंडळ व पोस्ट ऑफिस शिर्डीचा संयुक्त उपक्रम

शिर्डी | प्रतिनिधी
गणेशोत्सवाच्या शुभपर्वाचे औचित्य साधून सन्मित्र युवक मंडळ व पोस्ट ऑफिस शिर्डी यांच्या संयुक्त विद्यमाने शिर्डीकर नागरिकांसाठी विशेष आधार नोंदणी, आधार दुरुस्ती व डाक विभागाच्या विविध सेवांचे शिबिर आयोजित करण्यात आले आहे.
हे विशेष शिबिर गुरुवार, दि. १७ सप्टेंबर २०२६ रोजी सायंकाळी ७ ते रात्री ११ वाजेपर्यंत श्री साईबाबा संस्थान, गेट क्रमांक ४ येथे होणार आहे.
या शिबिरामध्ये ० ते ५ वर्षे वयोगटातील बालकांची नवीन आधार नोंदणी मोफत करण्यात येणार आहे. त्यासाठी बालकाचा जन्म दाखला तसेच आई किंवा वडिलांपैकी एका पालकाचे आधार कार्ड आवश्यक असून पालकांपैकी एकाची प्रत्यक्ष उपस्थिती बंधनकारक आहे.
याशिवाय नाव, पत्ता, जन्मतारीख, मोबाईल क्रमांक आदी आधारमधील आवश्यक दुरुस्ती व अपडेटची सुविधाही उपलब्ध करून देण्यात आली आहे. मोबाईल क्रमांक लिंक करण्यासाठी ₹७५, तर बायोमेट्रिक अपडेटसाठी ₹१२५ शुल्क असून इतर सेवांसाठी शासन नियमानुसार शुल्क आकारले जाणार आहे.

डाक विभागाच्या विविध योजनांची माहिती
शिबिरामध्ये पोस्ट ऑफिस बचत खाते (SB), PPF, सुकन्या समृद्धी योजना, अपघात विमा योजना तसेच डाक विभागाच्या इतर विविध बचत व शासकीय योजनांची माहिती व मार्गदर्शन नागरिकांना मिळणार आहे.
आपल्या फोटोचे ‘My Stamp’ही बनविता येणार
या शिबिराचे आणखी एक आकर्षण म्हणजे ‘My Stamp’ सुविधा. नागरिकांना स्वतःच्या किंवा आवडत्या फोटोसह वैयक्तिकृत टपाल तिकीट तयार करून घेता येणार आहे. वाढदिवस, लग्नाचा वाढदिवस, विशेष प्रसंग, कुटुंबीयांच्या आठवणी अथवा भेटवस्तू म्हणून हे वैयक्तिकृत टपाल तिकीट उपयोगी ठरू शकते.

तसेच सुकन्या समृद्धी योजना, लेक लाडकी योजना, लाडकी बहीण योजना आणि उपलब्ध इतर शासकीय योजनांबाबतही नागरिकांना मार्गदर्शन करण्यात येणार आहे.
शिर्डी परिसरातील नागरिक, पालक, महिला व ज्येष्ठ नागरिकांनी या विशेष शिबिराचा जास्तीत जास्त लाभ घ्यावा, असे आवाहन सन्मित्र युवक मंडळ व पोस्ट ऑफिस शिर्डी यांच्या वतीने करण्यात आले आहे.

.सामाजिक-सांस्कृतिक वसा जपणारे ‘अण्णा’!
माजी नगरसेवक गजानन (अण्णा) शेरवेकर यांनी शिर्डीच्या सामाजिक व सांस्कृतिक परंपरा जपण्यात नेहमीच योगदान दिले आहे. श्री साईबाबांच्या पालखी रथापुढे ढोल-ताशा पथकाच्या माध्यमातून सेवा देत साईभक्तीचा जागर करण्याची त्यांची परंपरा विशेष उल्लेखनीय आहे. सामाजिक बांधिलकी आणि साईभक्तीची सांगड घालत शिर्डीच्या सांस्कृतिक वैभवाला जपण्याचे कार्य अण्णा सातत्याने करीत आहेत.