शिर्डी :
शिर्डीच्या इतिहासात साईबाबांचे अत्यंत जवळचे आणि विश्वासू भक्त म्हणून ओळखले जाणारे कै. तात्याजी गणपतराव कोते पाटील यांची ८१ वी पुण्यतिथी गुरुवार दि. १२ मार्च २०२६ रोजी शिर्डी येथे भक्तिभावाने साजरी करण्यात येणार आहे. या पुण्यतिथीनिमित्त धार्मिक कार्यक्रम, कीर्तन तसेच महाप्रसादाचे आयोजन करण्यात आले असून साईभक्तांनी मोठ्या संख्येने उपस्थित राहण्याचे आवाहन करण्यात आले आहे.
कै. तात्याजी कोते पाटील हे साईबाबांचे अत्यंत निकटवर्ती भक्त होते. साईबाबांनी त्यांना आपल्या सख्ख्या भावाप्रमाणे मान दिला होता, तर तात्याजींच्या मातोश्री बायजामाई यांना साईबाबा आईप्रमाणे मानत असत. बायजामाई यांनी साईबाबांची आयुष्यभर मातेसारखी सेवा केली होती. त्यामुळे साईबाबा आणि कोते पाटील कुटुंब यांचे नाते अतूट आणि भावनिक मानले जाते. शिर्डीच्या धार्मिक व सामाजिक परंपरेत या कुटुंबाचे स्थान अत्यंत महत्त्वाचे मानले जाते.
पुण्यतिथीनिमित्त सकाळी ७ ते ९ या वेळेत कै. तात्याजी कोते पाटील यांच्या समाधीचे पूजन करण्यात येणार आहे. त्यानंतर सकाळी ९ ते १२ वाजेपर्यंत समाज प्रबोधनकार ह.भ.प. कृष्णानंद महाराज (बेलापूर) यांचे कीर्तन आयोजित करण्यात आले आहे. या कीर्तनातून साईभक्ती, संत परंपरा तसेच समाजप्रबोधनाचे संदेश दिले जाणार आहेत.
तसेच साईबाबांच्या माध्यान्ह आरतीनंतर महाप्रसादाचे आयोजन करण्यात आले असून सर्व साईभक्तांना महाप्रसादाचा लाभ घेण्याचे आवाहन करण्यात आले आहे. हा संपूर्ण कार्यक्रम श्री साईबाबा मंदिर परिसरातील कै. तात्याजी कोते पाटील यांच्या समाधीस्थळी पार पडणार आहे.
हा धार्मिक सोहळा साईभक्त कै. तात्याजी कोते पाटील भक्त मंडळ तसेच समस्त कोते पाटील परिवार, शिर्डी यांच्या वतीने आयोजित करण्यात आला आहे. साईबाबांचे जिवलग भक्त असलेल्या तात्याजींच्या पुण्यस्मरणानिमित्त दरवर्षी हा कार्यक्रम भक्तिभावाने साजरा केला जातो आणि त्याला मोठ्या संख्येने साईभक्त उपस्थित राहतात.
या पुण्यतिथी सोहळ्याला उपस्थित राहून साईभक्तांनी श्रद्धांजली अर्पण करावी आणि कार्यक्रमाची शोभा वाढवावी, असे आवाहन आयोजकांच्या वतीने करण्यात आले आहे.
