मंदिर परिसरात भरदिवसा हातात धारदार कोयता घेऊन दहशत माजवणाऱ्या तरुणाला शिर्डी पोलिसांनी बेड्या ठोकत त्याच्या मुसक्या आवळल्या आहेत. या घटनेमुळे सावळीविहीर खुर्द गावात काही काळ भीतीचे वातावरण निर्माण झाले होते.
शिर्डी प्रतिनिधी : धार्मिक स्थळाच्या परिसरात हातात धारदार कोयता घेऊन उघडपणे फिरत आरडाओरडा करत नागरिकांमध्ये दहशत निर्माण करणाऱ्या एका तरुणाविरुद्ध शिर्डी पोलिसांनी धडक कारवाई केली आहे. तेजस गोपाल गायकवाड (वय २८, रा. सावळीविहीर खुर्द, ता. राहाता) असे अटक करण्यात आलेल्या तरुणाचे नाव आहे.
पोलिसांना गुप्त बातमीदारामार्फत माहिती मिळाली होती की, संबंधित तरुण काहीतरी गैरकृत्य करण्याच्या उद्देशाने मंदिर परिसरात कोयता घेऊन फिरत आहे. माहितीची गांभीर्याने दखल घेत शिर्डी पोलिसांनी तातडीने पथक रवाना केले.
पोलिसांचे पथक घटनास्थळी पोहोचताच संबंधित तरुण भररस्त्यात हातात कोयता घेऊन आरडाओरडा करताना दिसून आला. त्याच्या या धिंगाण्यामुळे नागरिकांमध्ये एकच घबराट पसरली होती. परिसरातील दुकानदार भयभीत झाले होते, तर अनेक नागरिकांनी सुरक्षिततेसाठी घटनास्थळापासून दूर पळ काढला.
पोलिसांनी तात्काळ कारवाई करत आरोपीला ताब्यात घेतले. पंचांसमक्ष घेतलेल्या झडतीमध्ये त्याच्याकडून सुमारे १७.५ इंच लांबीचा धारदार कोयता जप्त करण्यात आला. सदर शस्त्र बाळगण्याबाबत विचारणा केली असता आरोपीकडून कोणतेही समाधानकारक उत्तर मिळाले नाही.
सार्वजनिक ठिकाणी हातात घातक शस्त्र घेऊन दहशत निर्माण करणाऱ्या या प्रकारामुळे नागरिकांच्या सुरक्षेचा प्रश्न पुन्हा ऐरणीवर आला आहे. आरोपीविरुद्ध शिर्डी पोलीस ठाण्यात भारतीय शस्त्र अधिनियम १९५९ च्या कलम ४ व २५ अन्वये गुन्हा दाखल करण्यात आला असून पुढील तपास सुरू आहे.
धार्मिक स्थळांच्या परिसरात अशा प्रकारे शस्त्रांचे प्रदर्शन करून दहशत माजवणाऱ्यांवर कठोर कारवाई होणे गरजेचे असल्याची भावना नागरिकांतून व्यक्त होत आहे.
