शिर्डी शहरात पोलीस व सुरक्षा यंत्रणा निष्क्रिय ठरल्याचा संताप व्यक्त होत असतानाच बसस्थानक परिसरात दुचाकी चोरीचा थरार उघडकीस आला. शिर्डी पोलीस, नगर परिषद विशेष पथक आणि शिर्डी वाहतूक पोलीस यांच्या उपस्थितीतच चोरट्यांनी हात साफ करण्याचा प्रयत्न केल्याने गंभीर प्रश्न निर्माण झाला आहे.
संस्थान व बसस्थानक कर्मचाऱ्यांची सतर्कता; एक आरोपी जेरबंद
तीन चोरटे बसस्थानक परिसरात आले आणि पार्किंगमध्ये उभ्या असलेल्या दुचाकी चोरण्याचा प्रयत्न करत होते. मात्र श्री साईबाबा संस्थान कर्मचारी आणि बसस्थानक कर्मचाऱ्यांनी ही बाब ओळखत तत्काळ त्यांना हटकले. आरोपी पळून जाण्याचा प्रयत्न करत असताना एका संशयिताला पकडून पोलिसांच्या ताब्यात देण्यात आले.
एकाच दिवशी ५-६ दुचाकी चोरी; टोळीचा संशय
धक्कादायक बाब म्हणजे याच दिवशी संध्याकाळी शिर्डी शहरातून ४ ते ५ दुचाकी चोरीला गेल्याची माहिती समोर आली आहे. तर बिरोबाबन परिसरातूनही एक मोटारसायकल लंपास झाली. पोलिसांनी निमगाव-निघोज येथील एका युवकाला ताब्यात घेतले असून ही एकट्याची कृती की टोळी कार्यरत आहे याचा तपास सुरू आहे.CCTV वाढवले; MSF तैनातीची मागणी जोरात
घटनेनंतर तातडीने संस्थान प्रशासनाने बसस्थानक परिसरात CCTV कॅमेरे वाढवून सुरक्षा कडक केली आहे. तरीही भाविक, प्रवासी आणि स्थानिकांच्या वाहनांची सुरक्षा धोक्यात असल्याने MSF (महाराष्ट्र सुरक्षा बल) कर्मचारी कायमस्वरूपी तैनात करण्याची मागणी जोर धरत आहे.
👉 शिर्डीत दुचाकी चोरट्यांचा उच्छाद वाढत असताना पोलीस प्रशासन नेमकं काय करतंय? असा संतप्त सवाल आता नागरिकांकडून उपस्थित केला जात आहे.
