शिर्डी : प्रतिनिधी
श्री साईबाबा संस्थानच्या वतीने आयोजित श्री गुरुपौर्णिमा उत्सव २०२६ ची सुरुवात मंगळवारी अत्यंत भक्तिमय आणि मंगलमय वातावरणात झाली. उत्सवाच्या पहिल्याच दिवशी समाधी मंदिरात श्री साईबाबांच्या पवित्र चरणांची विधिवत पाद्यपूजा करण्यात आली. त्यानंतर श्रींची प्रतिमा, श्री साई सच्चरित्राची पोथी आणि विणाची पारंपरिक मिरवणूक साईनामाच्या अखंड जयघोषात व टाळ-मृदुंगाच्या गजरात मोठ्या उत्साहात काढण्यात आली.
उत्सवानिमित्त समाधी मंदिरात संस्थानचे मुख्य कार्यकारी अधिकारी गोरक्ष गाडीलकर व त्यांच्या सुविद्य पत्नी सौ. वंदना गाडीलकर यांच्या हस्ते श्री साईबाबांच्या पवित्र चरणांची पाद्यपूजा संपन्न झाली. यावेळी उपमुख्य कार्यकारी अधिकारी भिमराज दराडे, मंदिर प्रमुख विष्णु थोरात आणि प्रभारी जनसंपर्क अधिकारी दिपक लोखंडे उपस्थित होते.
यानंतर निघालेल्या पारंपरिक मिरवणुकीत मुख्य कार्यकारी अधिकारी गोरक्ष गाडीलकर यांनी श्री साई सच्चरित्राची पोथी, उपमुख्य कार्यकारी अधिकारी भिमराज दराडे यांनी विणा, तर प्रभारी उपकार्यकारी अभियंता संजय जोरी आणि सीसीटीव्ही विभागाचे प्रभारी विभाग प्रमुख राहुल गलांडे यांनी श्रींची पवित्र प्रतिमा खांद्यावर घेऊन मिरवणुकीत सहभाग घेतला.
साईनामाच्या अखंड जयघोषाने आणि भक्तिरसाने भारावलेल्या वातावरणात निघालेल्या या मिरवणुकीत संस्थानचे प्रशासकीय अधिकारी संदीपकुमार भोसले, मंदिर प्रमुख विष्णु थोरात, प्रभारी जनसंपर्क अधिकारी दिपक लोखंडे, मंदिरातील पुजारी, शिर्डी ग्रामस्थ तसेच देश-विदेशातून आलेले हजारो साईभक्त मोठ्या संख्येने सहभागी झाले.
भक्ती, श्रद्धा आणि उत्साहाचा अनोखा संगम अनुभवायला मिळालेल्या या सोहळ्याने गुरुपौर्णिमा उत्सवाचा मंगलमय प्रारंभ झाला. संपूर्ण शिर्डीनगरी साईमय वातावरणात न्हाऊन निघाली असून पुढील तीन दिवस विविध धार्मिक कार्यक्रम, भजन-कीर्तन, पालखी सोहळे आणि आध्यात्मिक उपक्रमांमुळे साईभक्तीचा उत्सव अधिकच बहरणार आहे.
