संगमनेर | प्रतिनिधी
गोवंशीय जनावरांची अवैध कत्तल, गोमांसाची वाहतूक व विक्री करून आर्थिक लाभ मिळविणाऱ्या कथित संघटित टोळीविरुद्ध संगमनेर शहर पोलिसांनी मोठी कारवाई केली आहे. गुन्हा रजिस्टर क्रमांक ६७८/२०२६ मध्ये भारतीय न्याय संहिता (BNS) २०२३ मधील कलम १११ (संघटित गुन्हेगारी) लागू करण्यास मंजुरी देण्यात आली असून, ही कारवाई अत्यंत गंभीर मानली जात आहे.
१३ जुलै २०२६ रोजी पहाटे संगमनेर–पुणे मार्गावरील बुद्धविहाराजवळ पोलिसांनी टाटा कंपनीच्या छोटा हत्ती (MH-14 CD-0839) या वाहनाची तपासणी केली असता त्यामध्ये सुमारे ५०० किलो गोवंशीय जनावरांचे मांस आढळून आले. या कारवाईत सुमारे ३ लाख रुपयांचा मुद्देमाल जप्त करण्यात आला.
तपासात सलिम रियाज कुरेशी व अतिक ऊर्फ सोनू रफिक कुरेशी (दोघेही रा. मोगलपुरा, संगमनेर) यांची नावे निष्पन्न झाली. या आरोपींविरुद्ध यापूर्वीही अशाच स्वरूपाचे गुन्हे दाखल असल्याने त्यांनी आर्थिक फायद्यासाठी संघटित टोळी तयार करून गुन्हेगारी सुरू ठेवल्याचे पोलिसांच्या निदर्शनास आले.
या पार्श्वभूमीवर उपविभागीय पोलीस अधिकारी, संगमनेर यांनी प्रस्ताव सादर केल्यानंतर अपर पोलीस अधीक्षक सोमनाथ वाघचौरे यांनी प्रस्तावाची छाननी करून भारतीय न्याय संहिता २०२३ मधील कलम १११ लागू करण्यास मंजुरी दिली.
या गुन्ह्यात समद जावेद कुरेशी (वय २८, रा. जमजम कॉलनी, संगमनेर) याला अटक करण्यात आली आहे. तर सलिम रियाज कुरेशी आणि अतिक ऊर्फ सोनू रफिक कुरेशी हे अद्याप फरार असून, त्यांच्याबाबत माहिती असल्यास तात्काळ पोलिसांशी संपर्क साधण्याचे आवाहन करण्यात आले आहे.
पोलीस अधीक्षक मुम्मका सुदर्शन, अपर पोलीस अधीक्षक सोमनाथ वाघचौरे आणि उपविभागीय पोलीस अधिकारी कुणाल सोनवणे यांच्या मार्गदर्शनाखाली पोलीस निरीक्षक समीर बारवकर, सहाय्यक पोलीस निरीक्षक सचिन वाकडे व संगमनेर शहर पोलीस ठाण्याच्या पथकाने ही कारवाई केली.
