प्रतिनिधी | दैनिक साईदर्शन
पालकमंत्री राधाकृष्ण विखे पाटील यांच्या आवाजासारखा मॉर्फ करून तयार करण्यात आलेला कथित बनावट ऑडिओ व व्हिडिओ समाजमाध्यमांवर प्रसारित केल्याचा गंभीर प्रकार समोर आला आहे. या प्रकरणी गणेश मारुती डेंगळे (रा. निमगाव जाळी, ता. संगमनेर) याच्याविरुद्ध लोणी पोलीस ठाण्यात गुन्हा दाखल करण्यात आला असून, या घटनेमुळे राजकीय तसेच सामाजिक वर्तुळात मोठी चर्चा सुरू झाली आहे.
फिर्यादी अनिल नानासाहेब विखे यांनी दिलेल्या तक्रारीनुसार, संबंधित व्यक्तीने आपल्या इन्स्टाग्राम खात्यावर पालकमंत्री राधाकृष्ण विखे पाटील यांच्या आवाजासारखा भासणारा कथित मॉर्फ ऑडिओ आणि दिशाभूल करणारा व्हिडिओ प्रसारित केला. या सामग्रीमुळे समाजात गैरसमज निर्माण होण्याची शक्यता असून, मंत्री विखे पाटील यांच्या प्रतिमेला व चारित्र्याला धक्का पोहोचविण्याचा प्रयत्न करण्यात आल्याचा आरोप फिर्यादीत करण्यात आला आहे.
या प्रकरणाची गंभीर दखल घेत लोणी पोलिसांनी संबंधित व्यक्तीविरुद्ध गुन्हा नोंदविला असून, बनावट ऑडिओ-व्हिडिओ नेमका कसा तयार करण्यात आला, त्यासाठी कृत्रिम बुद्धिमत्ता (AI) किंवा अन्य तांत्रिक साधनांचा वापर झाला का, तसेच या प्रकरणामागे आणखी कोणी सहभागी आहे का, याचा तपास सुरू आहे.
सध्या सोशल मीडियावर कृत्रिम बुद्धिमत्तेच्या माध्यमातून बनावट आवाज, व्हिडिओ आणि छायाचित्रे तयार करून व्यक्तींची बदनामी करण्याचे प्रकार वाढत आहेत. त्यामुळे अशा तंत्रज्ञानाचा गैरवापर रोखण्यासाठी कठोर कारवाईची मागणी होत आहे.
