शिर्डी शहरातील श्रीरामनगर परिसरात १५ वर्षीय मुलाने राहत्या घरात गळफास घेऊन आत्महत्या केल्याची अत्यंत दुर्दैवी घटना घडली आहे. या घटनेमुळे संपूर्ण परिसरात हळहळ व्यक्त होत असून शहरात शोककळा पसरली आहे.
मिळालेल्या माहितीनुसार, प्रेम दशरथ हातांगळे (वय १५) याने ६ जुलै रोजी सायंकाळच्या सुमारास राहत्या घरात फॅनला साडीच्या सहाय्याने गळफास घेतला. ही बाब लक्षात येताच कुटुंबीयांनी त्याला तातडीने साईबाबा सुपर स्पेशालिटी हॉस्पिटल येथे उपचारासाठी दाखल केले. मात्र, वैद्यकीय अधिकाऱ्यांनी तपासणीअंती त्याला मृत घोषित केले.
घटनेची माहिती मिळताच शिर्डी पोलीस ठाण्याचे पोलीस निरीक्षक रणजीत गलांडे यांनी घटनास्थळी भेट देऊन पाहणी केली.
याप्रकरणी शिर्डी पोलिसांनी अकस्मात मृत्यूची नोंद केली असून पुढील तपास सुरू आहे.
प्राथमिक माहितीनुसार, काही दिवसांपूर्वी प्रेमच्या वडिलांचे निधन झाले होते. तो कुटुंबातील एकुलता एक मुलगा होता. त्यामुळे या घटनेने हातांगळे कुटुंबावर दु:खाचा डोंगर कोसळला आहे. मुलाने हे टोकाचे पाऊल कोणत्या कारणामुळे उचलले, याचा सर्व बाजूंनी तपास शिर्डी पोलीस करीत आहेत.
दरम्यान, एकुलत्या एक मुलाच्या निधनानंतर आईने फोडलेला आक्रोश पाहून घटनास्थळी उपस्थित नागरिकांचेही डोळे पाणावले. श्रीरामनगर परिसरात या घटनेमुळे शोककळा पसरली असून नागरिकांकडून हातांगळे कुटुंबीयांप्रती हळहळ व्यक्त केली जात आहे.
