शिर्डी : प्रतिनिधी
शिर्डी विधानसभा मतदारसंघाच्या विशेष संक्षिप्त पुनरीक्षण मोहिमेच्या पहिल्या टप्प्यात धक्कादायक चित्र समोर आले आहे. ‘एसआयआर’ प्रक्रियेत तब्बल ४० हजार ३६ मतदारांचे अर्ज जमा न झाल्याने मतदारसंख्येत तब्बल १३.६३ टक्क्यांची घट झाल्याची माहिती प्रांताधिकारी माणिकराव आहेर यांनी दिली आहे.
शिर्डी विधानसभा मतदारसंघात एकूण २७० मतदान केंद्रे असून यापूर्वी मतदारसंख्या २ लाख ९३ हजार ६३४ इतकी होती. मात्र, पुनरीक्षण मोहिमेत मोठ्या संख्येने अर्ज जमा न झाल्याने मतदारसंख्या मोठ्या प्रमाणात कमी झाली आहे.
शिर्डीत ८ ते ९ हजार मतदारांची घट!
विशेष म्हणजे, शिर्डी शहरातच तब्बल ८ ते ९ हजार मतदार कमी झाल्याचे समोर आले आहे. त्यामुळे शिर्डीतील मतदारांच्या संख्येत एवढी मोठी घट नेमकी कोणत्या कारणामुळे झाली, याची चर्चा राजकीय वर्तुळात सुरू झाली आहे.
लोणीत साडेचार हजार, राहात्यात २२०० मतदार कमी
लोणी परिसरात सुमारे साडेचार हजार, तर राहाता शहरात तब्बल २ हजार २०० मतदारांची घट झाली आहे. शिक्षण पूर्ण करून शहराबाहेर गेलेले विद्यार्थी तसेच लोहगाव परिसरातील मजुरांचे स्थलांतर यामुळे अनेक मतदार सध्याच्या पत्त्यावर उपलब्ध नसल्याचे प्रशासनाकडून सांगण्यात आले आहे.
मात्र, ४० हजारांहून अधिक मतदारांचे अर्ज जमा न होण्यामागे नेमकी कारणे काय? या प्रश्नाकडे आता सर्वांचे लक्ष लागले आहे. मतदार यादीतील ही मोठी घट आगामी काळात राजकीयदृष्ट्याही महत्त्वाची ठरण्याची शक्यता आहे.
नव्या तरुण मतदारांची नोंदणी सुरू
दरम्यान, १ ऑक्टोबर २०२६ रोजी वयाची १८ वर्षे पूर्ण करणाऱ्या तरुण मतदारांच्या नोंदणीची प्रक्रिया तहसीलदार अमोल मोरे यांच्या मार्गदर्शनाखाली सुरू आहे. डिजिटल लायझेशनची प्रक्रिया पूर्ण झाली असून पुढील टप्प्यात मतदारांकडून हरकती मागवून सुनावणी घेतली जाणार आहे.
यानंतर सर्व प्रक्रिया पूर्ण झाल्यानंतर शिर्डी विधानसभा मतदारसंघाची अंतिम मतदारसंख्या निश्चित होणार आहे.
४० हजार मतदारांचे अर्ज कुठे गेले? १३.६३ टक्के घट नेमकी किती कायम राहणार? आणि अंतिम मतदारयादीत किती नावे पुन्हा समाविष्ट होणार? याकडे आता शिर्डी मतदारसंघाचे लक्ष लागले आहे.
