शिर्डी | प्रतिनिधी :
माहेरून गाडी घेण्यासाठी पैसे आणण्याची मागणी करत विवाहितेचा शारीरिक व मानसिक छळ करणे, तसेच चारित्र्यावर संशय घेऊन मारहाण करण्याचा प्रकार शिर्डीत घडला. याप्रकरणी विवाहितेच्या फिर्यादीवरून शिर्डी पोलिस ठाण्यात चौघांविरुद्ध गुन्हा दाखल करण्यात आला आहे.
याबाबत काजल नितेश जगदाळे (रा. सातपूर, त्र्यंबक रोड, नाशिक; हल्ली रा. सावळीविहीर, ता. राहाता) यांनी पोलिसांत फिर्याद दिली आहे. फिर्यादीनुसार, मे २०१७ मध्ये त्यांचा नितेश राजीव जगदाळे यांच्याशी विवाह झाला. विवाहावेळी त्यांच्या आई-वडिलांनी पतीला सोन्याची चैन, अंगठी तसेच संसारोपयोगी साहित्य दिले होते. सुरुवातीचा सुमारे वर्षभर संसार सुरळीत सुरू होता. त्यानंतर त्यांना मुलगा झाला.
मात्र, कालांतराने पतीचे दारू पिण्याचे प्रमाण वाढले. दारूच्या नशेत घरी येऊन मारहाण करणे, शिवीगाळ करणे असे प्रकार सुरू झाले. काही काळ पती-पत्नी घरच्यांपासून वेगळे राहू लागले, मात्र त्यानंतरही पतीच्या वागण्यात कोणताही बदल झाला नाही.
‘गाडी घेण्यासाठी माहेरून पैसे आण, नाहीतर जिवंत सोडणार नाही’
पतीकडून माहेरच्या आई-वडिलांकडून गाडी घेण्यासाठी पैसे घेऊन येण्याची मागणी केली जात होती. पैसे आणले नाही तर जिवंत सोडणार नाही, अशी धमकीही दिल्याचे फिर्यादीत नमूद करण्यात आले आहे.
दरम्यान, पती मोबाईलवर दुसऱ्या महिलेशी बोलत असल्याचे पत्नीच्या निदर्शनास आले. याबाबत विचारणा करून समजावून सांगितले असता, उलट पतीने तिच्याच चारित्र्यावर संशय घेत मारहाण करून त्रास दिल्याचे फिर्यादीत म्हटले आहे.
बैठका होऊनही छळ थांबला नाही
पती-पत्नीमधील वाद मिटविण्यासाठी लग्न जमविणारे, सासरचे नातेवाईक तसेच फिर्यादीच्या आई-वडिलांच्या उपस्थितीत दोन-तीन वेळा बैठका घेण्यात आल्या. मात्र, त्यानंतरही पतीच्या वागण्यात कोणताही बदल झाला नसल्याचे फिर्यादीत नमूद आहे.
या प्रकरणी काजल जगदाळे यांच्या फिर्यादीवरून नितेश राजीव जगदाळे, शोभा राजीव जगदाळे, राजीव शिवाजी जगदाळे आणि निवृत्ती काळे यांच्याविरुद्ध शिर्डी पोलिस ठाण्यात गुन्हा दाखल करण्यात आला आहे. पुढील तपास शिर्डी पोलिस करीत आहेत.
