आदिवासी कुटुंबावर अन्याय करणारे अॅट्रॉसिटी गुन्ह्यातील आरोपी शेवगाव पोलीसांच्या मेहरबानीने मोकाट
अहमदनगर (प्रतिनिधी)- शेवगाव रोडवरील काटेवाडी जवळ आखेगाव-काटेवाडी रस्त्यावर एका अनुसूचित जमातीच्या इसमाला जातीवाचक शिवीगाळ करुन आणि त्याच्या पत्नीस बळजबरीने गाडीत बसवून पुढे नेऊन दूरवर सोडून दिला असल्याच्या प्रकाराचा गुन्हा दि.24 जानेवारी रोजी नोंदवून देखील आरोपी मोकाटप्रमाणे फिरत आहेत व पुन्हा त्रास देत आहेत तरीही पोलीसांकडून कुठलीही कार्यवाही होत नसल्याने पोलीसांची संशयास्पद भूमिका वाटत असल्याने पोलीस अधिक्षक व पोलीस उपअधिक्षक यांनी या प्रकरणी लक्ष घालून तात्काळ कार्यवाही करावी अन्यथा भविष्यात जिवाचे बरेवाईट झाल्यास सदरील आरोपी जबाबदार राहतील अशी मागणी पत्रकाद्वारे परमेश्वर भवार यांनी दिली आहे.
पुढे दिलेल्या पत्रकात म्हटले आहे की, आदिवासी समाज अशिक्षित अडाणी असल्याचा गैरफायदा काही गावातील लोक तसेच जातीवादी लोक करत असतात परंतू आता पोलीस प्रशासन देखील आदिवासी समाजावर अन्याय करतांना दिसत आहे. शेवगांव येथील पोलीस स्टेशन मध्ये दि.24/01/2024 रोजी आदिवासी कुटूंबाने फिर्यादी परमेश्वर माणिक भवार यांनी त्याच्यावर गुंड व्यक्ती नामे बाबासाहेब ज्ञानोबा बडे, विकास बडे, जनार्दन पालवे, दादासाहेब पालवे या सर्वांनी रस्त्यावर अडवून जातीवाचक शिवीगाळ करत फिर्यादी परमेश्वर भवार यांच्या पत्नीस जबरदस्तीने चारचाकी गाडीत टाकून घेवून जात धमकावत तुझ्या पत्नीला काय करतो बघ म्हणत दुर अंतरावर घेवून जात साळेगाव फाट्यावर नेऊन सोडल्याची तक्रार देवून देखील एक महिना होवून देखील शेवगांवचे वरिष्ठ पोलीस अधिकारी यांच्या मेहरबानीने सदर सर्व आरोपी मोकाट असून सर्व आरोपी हे फिर्यादीवर दबाव टाकत असून पोलीस फक्त बघ्याची भूमिका घेतांना दिसत आहेत त्यामुळे सदर प्रकरणात एवढा गंभीर गुन्हा दाखल होवून देखील पोलीस प्रशासनाच्या असा भोंगळ कारभाराकडे सर्व नगर जिल्ह्याचे लक्ष लागले असून लवकरच फिर्यादी व त्याचे कुटूंब आरोपीस तात्काळ अटक करुन न्याय देण्यासाठी जिल्हाधिकारी साहेब नगर येथे आमरण उपोषणास बसणार आहोत आणि भविष्यात जर आमच्या जिवाचे काही बरेवाईट झाल्यास उपरोक्त आरोपी जबाबदार राहतील असे श्री.भवार यांनी पत्रकाद्वारे कळविले आहे.
