श्री साईचरणी १५ लाख रुपयांचा हिरेजडित मोरपिसाकार ब्रोच अर्पण; साईभक्ताच्या श्रद्धेला सुवर्णस्पर्श
शिर्डी : श्री साईबाबांवरील अपार श्रद्धा आणि भक्तीभाव व्यक्त करत एका साईभक्ताने आज श्री साईचरणी अंदाजे १५ लाख रुपये किंमतीचा हिरेजडित मोरपिसाच्या आकाराचा आकर्षक ब्रोच अर्पण केला. ७६ ग्रॅम २७० मिलीग्रॅम वजनाचा हा मौल्यवान ब्रोच उत्कृष्ट नक्षीकाम आणि हिऱ्यांच्या देखण्या जडावामुळे विशेष आकर्षण ठरला आहे.
देश-विदेशातून लाखो भाविक दररोज श्री साईबाबांच्या दर्शनासाठी शिर्डीत येत असतात. साईबाबांप्रती असलेल्या अढळ श्रद्धेतून भाविक विविध प्रकारच्या देणग्या अर्पण करतात. त्याच भक्तीभावातून ही अनमोल भेट साईचरणी समर्पित करण्यात आली असून, ती साईभक्ताच्या निस्सीम श्रद्धेचे प्रतीक मानली जात आहे.
देणगी स्वीकारल्यानंतर श्री साईबाबा संस्थानच्या वतीने मुख्य कार्यकारी अधिकारी गोरक्ष गाडीलकर यांनी साईभक्ताचा सत्कार करून कृतज्ञता व्यक्त केली. संस्थान प्रशासनाने देणगीची आवश्यक नोंद करून ती नियमानुसार स्वीकारली.
विशेष म्हणजे, देणगीदार साईभक्ताने स्वतःची ओळख गोपनीय ठेवण्याची विनंती केल्याने संस्थानकडून त्यांचे नाव जाहीर करण्यात आलेले नाही. मात्र, साईबाबांवरील श्रद्धेपोटी अर्पण करण्यात आलेली ही मौल्यवान देणगी सध्या भाविकांमध्ये चर्चेचा विषय ठरत आहे.
