शिर्डी, दि. _ :
प्रजासत्ताक दिन २६ जानेवारी तसेच सलग सुट्ट्यांचा लाभ घेत देशाच्या विविध भागांतून साईभक्त मोठ्या संख्येने शिर्डीत दाखल झाले आहेत. गेल्या दोन दिवसांपासून साईनगरीत भाविकांची गर्दी वाढत असून मंदिर परिसर, दर्शन रांगा, रस्ते, बाजारपेठा तसेच बसस्थानक व रेल्वे स्थानक परिसरात प्रचंड वर्दळ पाहायला मिळत आहे.
संपूर्ण शहर भक्तिरसात न्हाल्याचे चित्र आहे.
भाविकांची वाढती गर्दी लक्षात घेता श्री साईबाबा संस्थान ट्रस्टच्या वतीने दर्शन व्यवस्था अधिक सक्षम करण्यात आली आहे. दर्शन रांगांचे योग्य नियोजन, पिण्याच्या पाण्याची सोय, स्वच्छता, वैद्यकीय सेवा तसेच स्वयंसेवकांची नियुक्ती करण्यात आली आहे. त्यामुळे भाविकांना कोणताही त्रास न होता सुरळीत दर्शन होत आहे.
याचबरोबर शिर्डी पोलीस प्रशासनाच्या वतीने चोख बंदोबस्त ठेवण्यात आला आहे. मंदिर परिसर, मुख्य चौक, पार्किंग स्थळे, बसस्थानक, रेल्वे स्थानक व शहरातील प्रमुख मार्गांवर अतिरिक्त पोलीस बंदोबस्त तैनात करण्यात आला आहे. वाहतूक कोंडी टाळण्यासाठी स्वतंत्र वाहतूक नियोजन करण्यात आले असून कुठेही अनुचित प्रकार घडू नये यासाठी सीसीटीव्हीच्या माध्यमातून सतत नजर ठेवली जात आहे.
भाविकांची संख्या मोठ्या प्रमाणात वाढल्याने शिर्डीतील हॉटेल, लॉजिंग, भोजनालये, फुलविक्रेते, प्रसाद विक्रेते, दुकानदार तसेच इतर व्यावसायिकांमध्ये समाधानाचे वातावरण आहे. अनेक दिवसांनंतर मिळालेल्या या गर्दीमुळे स्थानिक अर्थव्यवस्थेला चालना मिळाल्याचे व्यावसायिकांनी सांगितले.
संस्थान व पोलीस प्रशासनाच्या उत्तम समन्वयामुळे साईनगरीत शांततापूर्ण व शिस्तबद्ध वातावरण असून भाविकांनीही व्यवस्थेबाबत समाधान व्यक्त केले आहे. आगामी काही दिवसांतही भाविकांची गर्दी कायम राहण्याची शक्यता व्यक्त केली जात आहे.
याबाबत बोलताना नूतन नगराध्यक्षा जयश्री ताई थोरात यांनी सांगितले की,
“२६ जानेवारी व सलग सुट्ट्यांच्या पार्श्वभूमीवर शिर्डीत येणाऱ्या कुठल्याही साईभक्ताला शहरात कोणताही त्रास होणार नाही, याची विशेष काळजी नगरपरिषद प्रशासनाच्या वतीने घेतली जात आहे. स्वच्छता, पाणीपुरवठा, रस्ते, प्रकाश व्यवस्था तसेच वाहतूक नियोजनाबाबत संबंधित विभागांना स्पष्ट सूचना देण्यात आल्या आहेत. साईभक्तांची सेवा हीच आमची प्राथमिकता आहे.”
नगरपरिषद, श्री साईबाबा संस्थान ट्रस्ट व पोलीस प्रशासन यांच्यात उत्तम समन्वय असून भाविकांच्या सोयीसाठी सर्व यंत्रणा सज्ज ठेवण्यात आल्याचेही त्यांनी नमूद केले.
