शिर्डी : श्री साईबाबांवर देश-विदेशातील लाखो भाविकांची अपार श्रद्धा असून, श्रद्धेपोटी भाविक साईचरणी भरभरून दान अर्पण करत असतात. अशाच भक्तिभावाचे दर्शन नवी दिल्ली येथील साईभक्त श्री. सतीश कुमार चान्ना यांनी घडविले आहे.
श्री. चान्ना यांनी ७५ ग्रॅम वजनाचे, आकर्षक नक्षीकाम केलेले आणि हिऱ्यांनी जडविलेले सोन्याचे ब्रोच श्री साईबाबांच्या चरणी भक्तिभावाने अर्पण केले. या मौल्यवान ब्रोचची किंमत ११ लाख १९ हजार रुपये इतकी असल्याचे सांगण्यात आले.
साईभक्तांनी श्रद्धेने अर्पण केलेली ही अनमोल भेट श्री साईबाबांप्रती असलेल्या त्यांच्या नितांत श्रद्धेचे प्रतीक ठरली आहे.
श्री साईबाबांच्या चरणी देश-विदेशातील भाविकांकडून विविध स्वरूपात दान अर्पण केले जात असून, भाविकांच्या श्रद्धेचा हा अखंड प्रवाह आजही तितक्याच भक्तिभावाने सुरू आहे.
दरम्यान, या उदार देणगीबद्दल श्री साईबाबा संस्थानच्या वतीने संस्थानचे मुख्य कार्यकारी अधिकारी गोरक्ष गाडीलकर यांनी साईभक्त श्री. सतीश कुमार चान्ना यांचा सत्कार करून त्यांच्या भक्तिभावाबद्दल कृतज्ञता व्यक्त केली.
“सबका मालिक एक” या साईबाबांच्या शिकवणीवर नितांत श्रद्धा ठेवून साईचरणी अर्पण करण्यात आलेली ही मौल्यवान भेट भाविकांसाठीही प्रेरणादायी ठरत आहे.
