शिर्डी | प्रतिनिधी
श्री साईबाबा संस्थांच्या वतीने सालाबादप्रमाणे यंदाही महाशिवरात्री उत्सव भक्तिमय वातावरणात साजरा होत आहे. पहाटे ०५.१५ वाजता श्रींची काकड आरती संपन्न होताच मंदिर परिसरात भक्तिरसाची मंगलमय सुरुवात झाली.
पहाटेची काकड आरती ते मंगलस्नान
सकाळी ०५.५० वाजता श्रींचे मंगलस्नान पार पडले. त्यानंतर “शिर्डी माझे पंढरपूर” ही आरती सादर करण्यात आली. यावेळी समाधी चौथऱ्यावर भगवान शंकरांचा फोटो ठेवण्यात आला. श्री साईबाबांच्या मूर्ती व समाधीवर बेलपत्राचा हार अर्पण करून विशेष पूजन करण्यात आले. सकाळी ०६.२५ वाजता भाविकांसाठी दर्शनास प्रारंभ झाला.
मंदिर परिसर भक्तांनी फुलला
महाशिवरात्रीनिमित्त पहाटेपासूनच भाविकांची मोठी गर्दी उसळली असून मंदिर व परिसर भक्तांनी फुलून गेला आहे. दुपारी १२.०० वाजता श्रींची माध्यान्ह आरती
पालखी मिरवणूक आणि रुद्राभिषेक
सायंकाळी ०६.१५ वाजता धुपारती होणार असून रात्रौ ०९.१५ वाजता श्रींची पालखी गावातून मिरवणुकीस निघेल. गावातील प्रमुख मार्गांवरून ही पालखी मिरवणूक पार पडणार आहे. पालखी परत समाधी मंदिरात आल्यानंतर शेजारती होईल. तसेच रात्रौ १२.२८ ते ०१.१८ या वेळेत गुरूस्थान मंदिरात रुद्राभिषेक पूजा आयोजित करण्यात आली आहे.
साईप्रसादालयात भव्य नियोजन
महाशिवरात्रीनिमित्त साईप्रसादालयात सुमारे ६० ते ६५ हजार साईभक्तांना मोफत प्रसादरूपी साबुदाणा खिचडीचा लाभ देण्याचे नियोजन करण्यात आले आहे. यासाठी सुमारे ५५ पोती साबुदाणा, ४००० किलो शेंगदाणे, ७०० किलो शेंगदाणा तेल आणि २००० किलो बटाट्याचा वापर होणार आहे. आज सकाळीच अंदाजे २७,५०५ नाश्ता पाकिटांचे वितरण करण्यात आले.
भक्ती, सेवा आणि सुव्यवस्थेचा संगम
महाशिवरात्रीच्या निमित्ताने शिर्डीत भक्ती, सेवा आणि सुव्यवस्थेचा सुंदर संगम पाहायला मिळत आहे. संस्थान प्रशासन, सुरक्षा यंत्रणा व स्वयंसेवक यांच्या नियोजनामुळे उत्सव सुरळीतपणे पार पडत असून भाविकांमध्ये समाधानाचे वातावरण आहे.
