शिर्डी | प्रतिनिधी
श्री साईबाबा संस्थान विश्वस्त व्यवस्था, शिर्डी व ग्लोबल किडनी स्टोन फाउंडेशन, अहमदाबाद यांच्या संयुक्त विद्यमाने मोफत किडनी स्टोन शस्त्रक्रिया शिबिराचे आयोजन शनिवार दि. १४ फेब्रुवारी ते रविवार दि. १५ फेब्रुवारी २०२६ या कालावधीत करण्यात आले आहे.
या शिबिरामध्ये मोठ्या आकाराच्या किडनी स्टोनने ग्रस्त रुग्णांवर लॅप्रोस्कोपी पद्धतीने, तर लहान आकाराच्या किडनी स्टोनने ग्रस्त रुग्णांवर साऊंड वेव्हच्या साहाय्याने लिथोट्रेप्सी शस्त्रक्रिया अत्याधुनिक शस्त्रक्रिया व्हॅनद्वारे पूर्णतः मोफत करण्यात येणार आहे.
या शस्त्रक्रिया शिबिरासाठी पूर्व तपासणी प्रक्रिया सुरू असून, इच्छुक रुग्णांनी श्री साईनाथ रुग्णालय, शिर्डी येथील (रूम नं. २००) जनरल सर्जरी विभागाशी संपर्क साधावा. केवळ पूर्व तपासणी पूर्ण केलेल्या रुग्णांचीच शस्त्रक्रिया शिबिरामध्ये करण्यात येणार असल्याचे स्पष्ट करण्यात आले आहे.
या शिबिराचा जास्तीत जास्त गरजू रुग्णांनी लाभ घ्यावा, असे आवाहन श्री साईबाबा संस्थान विश्वस्त व्यवस्थेचे मुख्य कार्यकारी अधिकारी मा. गोरक्ष गाडीलकर (भा.प्र.से.) यांनी केले आहे. साईबाबांच्या सेवाभावी विचारातून राबविण्यात येणारे हे शिबिर गरीब व गरजू रुग्णांसाठी दिलासादायक ठरणार आहे.
पूर्व तपासणीसाठी येताना रुग्णांनी आधार कार्ड, रेशन कार्ड, आयुष्यमान भारत कार्ड, जुने वैद्यकीय अहवाल (रिपोर्ट्स) तसेच पासपोर्ट साईज फोटो सोबत आणणे आवश्यक आहे.
अधिक माहितीसाठी रुग्णांनी श्री साईनाथ रुग्णालय, रूम नं. २००, शिर्डी येथे प्रत्यक्ष संपर्क साधावा किंवा दूरध्वनी क्रमांक ०२४२३–२५८५३९, २५८५५५ यावर संपर्क करावा, असे आवाहन करण्यात आले आहे.
🙏 साईचरणी सेवा हेच ध्येय ठेवून रुग्णसेवेसाठी संस्थान सातत्याने कार्यरत आहे.
