निमगाव को-हाळे बायपासवर कातोरे वस्ती जवळ काल रात्री उशिरा भीषण अपघात घडला. तीन वाहनांचा एकमेकांवर जोरदार धडक झाल्याने परिसरात काही काळ भीतीचे वातावरण निर्माण झाले. अपघाताची तीव्रता मोठी असतानाही सुदैवाने कोणतीही जीवितहानी झाली नाही, मात्र काही जण जखमी झाले आहेत.
🚑 जखमींना तात्काळ दवाखान्यात हलविले
अपघातानंतर स्थानिकांनी तत्काळ मदतकार्य सुरू करत जखमींना दवाखान्यात पाठविले. घटनेची माहिती कातोरे वस्ती येथील रोहित कातोरे यांनी पोलीस स्टेशनला दिली.
👮♂️ पोलिसांची तात्काळ धाव, पंचनामा पूर्ण
माहिती मिळताच पोलीस पथकाने घटनास्थळी धाव घेत परिस्थिती नियंत्रणात आणली. अपघाताचा पंचनामा करून पुढील तपास सुरू करण्यात आला आहे.
⚠️ बायपासवर अपघातांची मालिका — प्रशासन झोपेत?
निमगाव को-हाळे बायपासवर अपघातांचे प्रमाण दिवसेंदिवस वाढत असून स्थानिक नागरिकांमध्ये भीतीचे वातावरण आहे. वेगमर्यादा नियंत्रण, योग्य संकेतचिन्हे, रस्त्यांची दुरुस्ती आणि रात्री पुरेशी प्रकाशयोजना यांसारख्या मूलभूत उपाययोजना तातडीने राबविण्याची मागणी जोर धरत आहे.
👉 “आज जीव वाचला, उद्या काय?” — नागरिकांचा सवाल
या भीषण अपघातानंतर स्थानिक नागरिकांनी प्रशासनाला थेट इशारा दिला असून, तात्काळ ठोस पावले उचलली नाहीत तर तीव्र आंदोलन छेडण्याचा इशाराही दिला आहे.गाडी घुसली थेट गोठ्यात — कातोरे कुटुंबाचे मोठे नुकसान
निमगाव को-हाळे बायपासवरील भीषण अपघातात एक धक्कादायक बाब समोर आली आहे. अपघातातील एक वाहन थेट कातोरे कुटुंबाच्या गाईंच्या गोठ्यात घुसल्याने मोठे नुकसान झाले. गोठ्याचे बांधकाम कोसळून साहित्याची नासधूस झाली असून जनावरांनाही इजा झाल्याची माहिती समोर येत आहे.
या घटनेमुळे कातोरे कुटुंब आर्थिक अडचणीत सापडले असून, प्रशासनाकडून तात्काळ पंचनामा करून नुकसानभरपाई देण्याची मागणी करण्यात येत आहे. स्थानिकांनीही या घटनेनंतर संताप व्यक्त करत बायपासवरील वाढत्या अपघातांना जबाबदार कोण? असा सवाल उपस्थित केला आहे.
