शिर्डी | प्रतिनिधी
शिर्डी पोलीस स्टेशनच्या हद्दीत येणाऱ्या रुई (ता. राहाता) येथील चर्च परिसरात बेकायदा सुरू असलेल्या तीन पत्ती तिरट नावाच्या हारजितीच्या जुगार अड्ड्यावर शिर्डी पोलिसांनी धडक छापा टाकत जुगार खेळणाऱ्या सहा जणांना रंगेहाथ पकडले. या कारवाईत रोख रक्कम, मोबाईल फोन, दुचाकी वाहने व जुगार साहित्य असा मुद्देमाल जप्त करण्यात आला आहे.
दि. २८ जानेवारी २०२६ रोजी दुपारी २.४५ वाजता, पोलीस निरीक्षक रणजित गलांडे यांच्या आदेशानुसार पो.कॉ. विक्की विजय त्रिभुवन (ब.नं. ४७७) यांनी सरकारी फिर्यादी म्हणून कारवाई केली. मिळालेल्या गुप्त माहितीच्या आधारे रुई येथील चर्चच्या भिंतीच्या आडोशाला छापा टाकण्यात आला.
छाप्यादरम्यान काही इसम गोलाकार बसून पत्त्यांच्या साहाय्याने पैशांवर जुगार खेळताना आढळून आले. पोलिसांनी पंचासमक्ष छापा टाकत सर्वांना ताब्यात घेतले. अंगझडतीदरम्यान आरोपींकडून रोख रक्कम, तीन पत्ते, अँड्रॉईड मोबाईल फोन व दुचाकी वाहने जप्त करण्यात आली.
👥 पकडलेले आरोपी व जप्त मुद्देमाल
🔹 संदीप सुधाकर खरात (वय ४५) – रोख ₹११० व पत्ते
🔹 संजय यौहान कोळगे (वय ५६) – रोख ₹१६०, विवो मोबाईल व स्प्लेंडर दुचाकी
🔹 अशोक कचरु कोळके (वय ५३) – रोख ₹१४०, OPPO मोबाईल
🔹 अर्जुन गबाजी खरात (वय ६२) – रोख ₹१३०, सॅमसंग मोबाईल व हिरो सी.डी. डॉन दुचाकी
🔹 विजय विश्वनाथ चव्हाण (वय ६१) – रोख ₹१२०
🔹 बाबासाहेब दादा खरात (वय ६४) – लावा कंपनीचा मोबाईल
याशिवाय घटनास्थळी जमिनीवरून ₹४३० रोख रक्कम व तीन पत्ती तिरट जुगार साहित्य एकत्रितरीत्या मिळून आले आहे.
⚖️ पुढील कायदेशीर कारवाई
सदर प्रकरणी संबंधित आरोपींविरुद्ध बेकायदा जुगार खेळण्याप्रकरणी कायदेशीर कारवाई करण्यात येत असून पुढील तपास शिर्डी पोलीस स्टेशनकडून सुरू आहे.
🚔 शिर्डी पोलिसांचा इशारा
“बेकायदा जुगार, अवैध धंदे खपवून घेतले जाणार नाहीत. कायदा मोडाल तर थेट कारवाई केली जाईल,” असा इशारा पोलिसांनी दिला आहे.
