नांदेड: एका पोलीस कर्मचाऱ्याने आपल्या सर्व्हिस रिवाल्वरमधून गोळी झाडून पत्नीचा खून केल्याची धक्कादायक घटना समोर आली आहे. या घटनेने परिसरात एकच खळबळ माजली. (१७ सप्टेंबर) सायंकाळी ६ वाजेच्या सुमारास धनेगाव परिसरातील आयडियल सोसायटी येथे ही खळबळजनक घटना घडली आहे.
पत्नीचा खून केल्यानंतर पोलीस कर्मचाऱ्याने स्वतः पोलीस ठाण्यात हजर होऊन पोलिसांना याबाबतची माहिती दिली. अफजल पठाण असं पत्नीची हत्या करणाऱ्या पोलीस कर्मचाऱ्याचं नाव आहे.अफजल पठाण हे आपल्या कुटुंबीयांसोबत धनेगाव परिसरातील आयडियल सोसायटी येथे राहतात.
विमानतळ पोलीस ठाण्यात ते हेड कॉन्सस्टेबल पदी कार्यरत आहेत. त्यांच्या पत्नी नाजीम बेगमसोबत त्यांचे नेहमी छोट्या-छोट्या कारणांवरून वाद होतं असायचे. अफजल पठाण हे मंगळवारी सायंकाळी ड्युटी करून घरी गेले.
यावेळी पुन्हा पती-पत्नीमध्ये वाद झाला. हा वाद एवढा टोकाला गेला की पोलीस कर्मचाऱ्याने स्वतः जवळील सर्व्हिस रिवाल्वर काढली आणि थेट पत्नीवर गोळी झाडली.
