शिर्डी (प्रतिनिधी) –
“मित्रावर ठेवलेला विश्वासच शेवटी घातक ठरला,” अशी घटना शिर्डी परिसरात घडली आहे. साकुरी शिव येथील विश्वास बाबुराव वाघमारे (वय 46, व्यवसाय – मजुरी) यांनी आपल्या परिचितावर ठेवलेल्या विश्वासामुळे आता पोलिस ठाण्याची पायरी चढावी लागली आहे.
मिळालेल्या माहितीनुसार, वाघमारे यांची पाच वर्षांपासून प्रमोद रमेश गायकवाड (वय 40, रा. शिर्डी, ता. राहाता, जि. अहिल्यानगर) याच्याशी घट्ट मैत्री होती. दि. 01 जुलै 2025 रोजी दुपारी सुमारास, वाघमारे सलून दुकानात काम करत असताना प्रमोद तेथे आला. “मला गावाला जायचे आहे, तुझी मोटारसायकल दे, आलो की लगेच परत करतो,” असे सांगून त्याने विश्वास संपादन केला आणि गाडी घेऊन गेला.
वाघमारे यांनी मित्रावर विश्वास ठेवून गाडीची चावी दिली, पण त्यानंतर प्रमोद हा परतलाच नाही. शोधाशोध करूनही तो व गाडी दोघेही बेपत्ता राहिल्याने अखेर वाघमारे यांनी शिर्डी पोलिस ठाण्यात लेखी फिर्याद दाखल केली आहे.
फिर्यादीत नमूद केल्याप्रमाणे गाडी ही हिरो कंपनीची काळ्या रंगाची मोटारसायकल (क्रमांक MH-17 DB 3695) असून, तिची किंमत सुमारे ₹30,000/- इतकी आहे. इंजिन आणि चेसिस क्रमांकही पोलिसांकडे सादर केले आहेत.
सदर प्रकरणी शिर्डी पोलिसांनी तपास सुरू केला असून, ही घटना विश्वासघातातून झालेली फसवणूक की योजनाबद्ध चोरी याबाबत चौकशी सुरू आहे.
या घटनेनंतर परिसरात चर्चेला उधाण आले असून नागरिकांमध्ये चर्चा —
👉 “आजकाल मित्रावरसुद्धा पूर्ण विश्वास ठेवणे धोक्याचे झाले आहे!”
— साईदर्शन न्यूज, शिर्डी 📰
