राहता, (प्र.) शिवसेनेला डावलून राहाता पंचायत समितीच्या नवीन इमारतीचे उद्घाटन पार पडले. मुख्यमंत्री एकनाथ शिंदे यांच्या शिवसेनेला साधे निमंत्रण पण दिले नसल्याने शिवसैनिकात प्रचंड नाराजी आहे. महायुतीचे सरकार, महायुतीत एकजूट असे वारंवार ठसविले जात असेल,
तरी आजचा राहाता येथील कार्यक्रम हा भाजपचाच असल्याचे मंत्री राधाकृष्ण विखे पाटील यांनी दाखवून दिले आहे. महायुती एक असल्याच्या केवळ वल्गना असल्याचेही या निमित्ताने पुढे आले आहे. उपमुख्यमंत्री अजित पवार यांच्या राष्ट्रवादीत असलेले आणि कोल्हे परिवाराला शह देण्यासाठी जवळ केलेले आ. आशुतोष काळे यांना आवर्जून निरोप होते
सत्तेत असणाऱ्या मुख्यमंत्री एकनाथ शिंदे यांच्या पदाधिकाऱ्यांनी याबाबत तीव्र नाराजी व्यक्त केली आहे. जिल्हाप्रमुख कमलाकर कोते व तालुका प्रमुख सागर बोठे यांनी याकडे मुख्यमंत्र्यांचे लक्ष वेधण्यात येणार असल्याचे सांगितले.
शिवसेनेवर विखे परिवाराची काय नाराजी आहे, शिवसेना पदाधिकाऱ्यांना का डावलले, हे मंत्री राधाकृष्ण विखे पाटील यांनी जाहीर करावे. आमच्या पक्षाच्या जिल्हाप्रमुखांना डावलून हा कार्यक्रम होत असल्याने आम्ही सर्वांनी कार्यक्रमावर बहिष्कार टाकला, अशी सतप्त प्रतिक्रिया बोठे यांनी दिली
राहाता पंचायत समितीच्या १४ कोटी रुपयांच्या नूतन इमारत कार्यलयाच्या उदघाटन कार्यक्रमास भाजप नेत्या माजी मंत्री पंकजाताई मुंडे व अजित पवार गटाचे सर्व पदाधिकारी मंचावर उपस्थित होते. मंचावर शिवसेनेचे जिल्हाप्रमुख कमलाकर कोते न दिसल्यामुळे तालुकाप्रमुख सागर बोठे यांनी कोते यांना संपर्क केला. कोते यांनी आपणास आमंत्रण नसल्याचे सांगितले
