शिर्डी : श्री साईबाबांवर देश-विदेशातील लाखो भाविकांची अढळ श्रद्धा असून भाविक भक्तिभावाने श्रींच्या चरणी विविध प्रकारे दान अर्पण करीत असतात. साईबाबांप्रती असलेल्या याच श्रद्धा आणि भक्तीपोटी तेलंगणा राज्यातील हैदराबाद येथील साईभक्त श्री. के. एस. एस. भगवान यांनी श्री साईबाबांच्या चरणी आकर्षक नक्षीकाम असलेला सुवर्ण-हिरे जडीत हार अर्पण केला.
सदर हाराचे वजन १९३.७०० ग्रॅम असून त्यावर आकर्षक नक्षीकाम करण्यात आलेले आहे. या मौल्यवान हाराची अंदाजे किंमत २३ लाख ५९ हजार ६५३ रुपये इतकी आहे. साईभक्ताने अत्यंत भक्तिभावाने हा सुवर्ण-हिरे जडीत हार श्री साईबाबांच्या चरणी अर्पण केला.
या प्रसंगी जिल्हा व प्रधान न्यायाधीश तथा श्री साईबाबा संस्थानच्या तदर्थ समितीचे अध्यक्ष श्री. शिवाजीराव कचरे यांच्या हस्ते दानशूर साईभक्त श्री. के. एस. एस. भगवान यांचा शाल, श्रीफळ व पुष्पगुच्छ देऊन सत्कार करण्यात आला.
यावेळी श्री साईबाबा संस्थानचे मुख्य कार्यकारी अधिकारी गोरक्ष गाडीलकर (भा.प्र.से.) उपस्थित होते. साईभक्तांच्या या उदार दानामुळे संस्थानकडून त्यांचे आभार व्यक्त करण्यात आले.
